MCC bawhchhia a puhna ECI-ah thawn dawn

Dampa Bial-a Assembly by-election lo awm tura Chief Minister Lalduhoma leh Adviser to Chief Minister Dr. Lorrain Lalpekliana Chinzah te chu Model Code of Conduct (MCC) bawhchhia nia puhna ah an insawifiah tawh a, Vawiin hian Election Commission of India-ah thawn a ni ang.

Zawhna chhangin Dampa bial By-election lo awm tura Returning Officer leh MCC Nodal Officer ni bawk Malsawmzuala chuan MNF Legal Board hnen atanga Chief Minister Lalduhoma leh Adviser to Chief Minister Dr. Lorrain Lalpekliana Chinzah ten MCC an bawhchhia tih puhna an dawn chungchangah ZPM lam atanga insawifiahna an dawng tawh a. Mamit Bawrhsap, District Election Officer (DEO) ni bawk leh Returning Officer (RO) te'n an ngaihdan an thawh chu CEO lam hian an lo enfiah ve leh a. An hmuh dan hi Election Commission-ah an thawn ang a, Commission hian thutlukna a siam dawn a ni.

CM leh Adviser to CM te MCC bawhchhia a puhna hi MNF Party aiawhin Ukil Zothansangi Hmar-in a thehlut a. Lalduhoma hi October ni 21-a West Phaileng khua a ZPM Candidate tana a Campaign-na-ah Reiek khua leh a chhehvel khaw 14 chawm tur cheng vbc. 770 ruahman a nih tur thu a puan chu inthlan dan bawhchhiatna niin an sawi a. Dr. Lorrain Lalpekliana'n October ni 17 khan Parvatui leh Phulpui West khua-ah a thlawna damlo inentirna hun huaihawtin damdawi pawh a thlawnin tam tham tak sem nia sawi a ni bawk.

Hetihlai hian AAP Mizoram chuan Inrinni khan thuchhuah siamin, October ni 3-a PWD changtu Minister Vanlalhlana’n Phuldungsei khuaa a Campaign-na ah North East Special Infrastructure Development Scheme (NESIDS) hnuaiah Pukzing leh Silsury kawng, Truck kal theihna a siam tura awm vek tawh, ZPM Candidate Vanlalsailova a tling lo a nih chuan ngaituah nawn a ngai leh tur anga sawi a, Dampa Bial mipuite rilru a ti chi-ai chuan The Representation of the People Act, 1951 leh The Model Code of Conduct chiang takin a kalh niin an sawi a, India Constitution hnuaia Article 19 (1) (a) a tiderthawng bawk tih sawiin, Election Commission of India hnenah hrem a nih ngei theih nan leh mipui a tithaih te thlavang hauh nan Inrinni khan thubuai an thehlut tih an sawi a ni.

Dampa bial khaw thenkhata a thlawna T-Shirt sema BJP puhna chu Mamit District Election Officer chuan MCC bawhchhia a puhna thubuai a ziaklut bawk a. Hemi chungchang insawifiah tura BJP hruaitute a tihna chhan a nih hnuah la ngaihtuah zawm tur a ni ang. 

October ni 6, 2025 khan ECl chuan Dampa Bial MLA by-election neih hun atan November 11, 2025-a ruat tih a puang a, hemi rual hian Model Code of Conduct (MCC) chu hman zui nghal a ni.