Sairang Railway Station-a zin mite dawnsawn an nih dan Home Minister hovin enfiah a ni

Sairang Railway Station-a Rel a lo luh hnu a State pawn atanga zin mi lo lutte dawnsawn an nih dan chu nimin khan Home Minister K. Sapdanga hovin a hmunah enfiah a ni.

Nimin-a Home Minister in Sairang Railway Station a tlawhna ah hian NF Railways (Construction)-a Deputy Chief Engineer, Harjimal Meena chuan Sairang Railway Station-a zin mite dawnsawn an nih dan leh changtlung zawka thawmthat a nih theih nana hmachawp la awmte a tarlang a. Home Minister K. Sapdanga chuan Rel hmanga inkalpawhna kawnga hmasawnna a thlen mek rualin zin mite dawl zo tur leh harsatna an neih lohna turin Sairang Railway Station pawh buatsaih zel a pawimawh thu a sawi a. State pawn atanga Rel hmanga zin mi lo lut ten Inner Line Permit la chhuak tura Rel Station-a rei tak intlar ngai thin chu chinfel vat a tul thu sawiin, Mizoram mi leh sa te leh ILP dil chawp ngai lote tan chhuahna hran buatsaih vat turin NF Railway thuneitute chu a hrilh bawk a ni.

Home Minister hian Sairang Railway Station-a tlawhna hunah hian tun dinhmuna ILP pekchhuah leh endikna kalpui dante a enpui a, Sairang Railway Station tih changtlun zelna tura ruahmanna la awmte chu NF Railways-a thawktuten sawifiahin an entir bawk a. He huna tarlan danin, Rel a lo thlen hian zinmi 250 atanga 300 vel chu Sairang Railway Station-a chhuk an awm thin thu sawi a ni a. Transport Department ruahmanna in Sairang leh Aizawl inkar tlan tur MST Bus pahnih dah a ni tawh a, chuanman hi mi pakhat tan Rs. 80 a ni.

State pawn atanga lo lut, zin miten ILP dil a hun rei tak an hman loh nan Online-a dilna siam a nih bakah Rel chhungah ILP dilna form semchhuah theih tura ruahmanna siam tur a nih thu tarlan a ni a. Tuna hman mek, Online ILP Guidelines Version 2 chu siamthat mek niin awlsam zawka dilna buaipui zung zung a nih theih nan Version 3 pawh peihfel tep a nih thu tarlan a ni a. Sairang Railway Station-ah hian zin mite kaihruaia Mizoram hmun nuam leh thlawh tlakte lo kawhhmuh zung zung thei tur Tourist Facilitation Centre ruahman a tul thu sawi a ni bawk a. Heng bakah hian ILP siam ngai leh tualchhung mi passenger te chhuahna gate awm kawp chu a hrang ve vein a chhuahna gate chu ni hnih (2) chhung ngeia siam zo nghal turin thutlukna siam a ni a, ILP nei lo tlanchhiate pawh umzui zel an nih thu leh thawnhaw nghal zel an ni bawk tih tarlan a ni.

Home Minister hova Sairang Rel Station tlawhna ah hian Adviser to Chief Minister TBC. Lalvenchhunga, Chief Secretary Khilli Ram Meena, DGP Sharad Agarwal leh Home Department leh ICT Department-a Secretary te bakah Aizawl DC leh SP te an tel a ni.