Chief Minister in ‘Hnahsin Kut 2025’ a hawng

Chief Minister Lalduhoma chuan nikum chhung khan Mizoram chu hmarchhak-a khualzin hipluh lama hmasawn nasa ber kan nih thu a sawi.

Champhai Zotlang Mual-a ‘Hnahsin Kut-2025’ hawnna hun nimin a neih a hmanpuina ah Chief Minister Lalduhoma chuan kan ram ah hnamdangte an rawn zin a, kan ram mawizia te, boruak nawmzia te, nature hmuhnawm zia te an rawn hmuh thu sawiin, “Khualzin hipluh theihna remchang kan ngah tih an hria a ni. Nimahsela, keimahni zawkin kan hmang thiam mai si lova. Theihna tam tak nei, hmang chhuak thiam si lo khan kan awm reng thin,” a ti a. “Tunah chuan thangthar fingvar zawk in lo chhuak a, Tourism Department pawhin Tourism Sector a kalpui thiam tial tial a. Inkalpawhna kawng a lo tha ve zel bawk a. Khualzin kan hip tam ve ta tial tial mai. Nikum chhung khan Mizoram chu hmarchhaka khualzin hipluh lama hmasawn nasa ber kan ni ta a ni,” tiin Chhinchhiah chinah khualzin 5,20,000 chuangin Mizoram an rawn tlawh thu leh a kum hmasa aia a punna chu 139.50% a ni tih a sawi a. Kumin ah Rel-in Sairang a rawn thlen tak avangin khualzin hi an pung hle turah an ngai ith a sawi.

Kan ram hi kan enkawl thiam a, kan khawtlang nun mawi tak hi kan zawrh thiam bawk chuan sum leh pai tam tak hmuh theihna leh kan hnam chawilarna remchang tak kan nei tih pawh Chief Minister chuan sawiin, “Khualzin tana tlawh nuam taka insiam thiam hi Tourism Sector-a a pawimawh lai ber a ni. Kan ram mawi tak an rawn hmuh rual hian Zo nun zemawi, tlawmngaihna te, rinawmna te, aia upa zahna te, mikhualte chunga that chhuah thin hnam kan nihna te hi rawn hmu tel ngei se. Kan hnam kan chawimawi tihna a ni nghal zel,” a ti a. Khualzin rawn kal tam ber turte hi Foreigner an ni lo tih pawh sawiin, “Kan Indian-pui, Vai kan tihte khu an ni hlawm a. Vai rawn zin hi lo tawngpawng hlauh ngawt tur a ni lo. ILP neiin an rawn lut a, an haw a hunah an haw ve leh mai dawn a ni. Heng khualzinte hian kan ramah sum leh pai an rawn hmang a, chung chu keini tan sum lakluhna hnar an lo ni ta thin a ni. Mizoram sum hi kan thenawm State-ah a luangthla hnem tawh a. Tourism hmanga laklet dan kan dap ve a ngai a ni,” a ti bawk.

Nimin-a Hnahsin Kut hawnna hunah hian Organising Committee Chairman Dr. Samuel Laldinthara chuan inlawmna thu sawiin, an tum ber chu khualzin hip a nih thu a sawi a. He hunah hian Lt. Col. Clement Lalhmingthanga MLA leh KVI Board Chairman C. Lalremliana te pawh telin kumin-a Hnahsin Kut hi a tum hnihna a ni a, Champhai Nature Conservancy, YMA Zotlang Branch, Champhai District Photographers Society, Champhai North Joint VC, Champhai South Joint VC, Zotlang, New Champhai leh Tlangsam VC te tangkawpin an buatsaih a ni.