Myanmar atanga raltlan 11,693 chhinchhiah tawhin za zela 37.40 chauh chhinchhiah an la ni
Home Department chhinchhiah danin Mizoram-ah hian Myanmar raltlan mi 31,265 an awm mek a, an zinga 3,319 chu mipa niin hmeichhia 3,584 bakah naupang (kum 18 hnuai lam) mi 4,790 an awm bawk a. Raltlan chhinchhiah hna hi July, 2025 tawp khan tan niin Mamit District-ah July 28, 2025 khan tan a ni a, July thla chhungin District tinah bultan vek niin raltlan an awm tlemna District-ah hna hi chak taka kalpui a nih laiin an awm tamna, Champhai, Siaha leh Lawngtlai District-ah kalpui chak a harsa tih Department thawktuten an sawi a. “Raltlan chhinchhiahna khawl hman mek hian a duh fir a, chak zawka hnathawh a nih theih nan khawl kan hman mek, ‘Thales’ hi lei belh kan tum a. Heng khawlte hi raltlan awm tamna District-ah pek belh kan tum,” an ti.
Chhinchhiahna atanga a lan danin Mizoram-ah hian Myanmar raltlan mi 31,265 awmin an zinga 11,693 te chu Foreigners Identification Portal (FIP) hmangin Biometric enrolment hmanga chhinchhiah an ni tawh a, raltlan awm zat atanga chhutin Khawzawl District-ah raltlan chhinchhiah tam berin za zela 94.19 chhinchhiah an ni tawh a, Serchhip District in dawtin za zela 91.50 chhin-chhiah an ni tawh bawk a. Raltlan chhinchhiah tlemna ber Champhai District-ah chuan za zela 20.17 chauh chhinchhiah an la awm a ni.
Raltlan zingah Biometric hmanga chhin-chhiah duh lo leh hlau an awm thu leh hlauhawm loh thu thawktute chuan sawiin, “Chhinchhiah hi anmahni raltlan tan a tha zawkin a him zawk a, chhinchhiah an nih loh chuan dan lova rawn lut (illegal migrant) anga chhiar an ni dawn a. Dan lova lut anga chhiar an nih chuan thawnlet an ngai dawn a; chuvangin, raltlan awmte hian hlau lova chhinchhiah hna hi tha taka thlawp turin kan ngen a ni,” an ti a. Raltlan chhinchhiah hnathawh kawngah harsatna hrang hrang an tawk tih sawi bawkin, “Kan duh angin Internet Connection kan nei tha lo a, hei hian hnathawhna kawngah harsatna min siam a. Hei bakah raltlante hi a then haw, a then lo kalte an nih avangin a changin an tam a, a changin an tlem bawk a. An zat chiah pawh tihdik a har khawp mai,” an ti.
Thudawn danin sawrkar laipui chuan Myanmar raltlante chhinchhiah tur hian Mizoram sawrkar chu tum engemaw zat a hriattir tawh a; mahse Mizoram hian chhuanlam siamin a hnar thin a. Sawrkar laipuiin chhinchiahna tura a ruahman, Embassy Form chu raltlante tan a him lo thei nia sawiin, chhinchhiahna dang hmang turin sawrkar laipui chu a ngen a. Embassy Form-ah hian Myanmar sawrkarin raltlante hming leh nihna a hriat theih vek dawn avangin raltlante tan hian a him lo niin an sawi a. Mizoram sawrkar ngenna hi pawmin Foreigners Identification Portal (FIP) hmanga chhinchhiah turin ruahmanna a rawn siam ta a ni.