Sawhthing hralh lehna man a sang lo tlangpui

Mizoram sawrkar in kuthnathawktute hnen atanga Sawhthing a lei chu hralhchhawn leh niin a hralhna man erawh a sang lo hle thung a ni.

Mizoram sawrkarin Sawhthing a leikhawm hi hnamdang leh Mizote hnenah hralhchhawn leh niin an hralhna rate erawh a inang lo nual nia thudawn a ni a, a lei tlawm ber chuan kg-ah Rs. 3-in an lei a ni. Thudawn danin Buffer Stock Point atanga kg-ah Rs 3-a lei hi mi pali an awm a, Lalremruati chuan kg-ah Rs. 3-in kg. 62,976 a lei a, R. Chaudari pawhin Rs. 3 zelin kg. 6,348 a lei a. Sai Kripa Association-in kg. 26,350 an lei bakah Rakhes Ali chuan Rs. 3 zelin kg. 11,679 a lei bawk a ni. Hetihlai hian Buffer Stock Point atanga lei to ber chuan kg. ah Rs. 30/- in an lei thung a, Rs. 30/- a lei hi mi pahnih awmin NERAMAC-in kg. 424,819 leh IVC Agrovet-in kg. 98,189.91 an lei a ni.

Sawrkar in Sawhthing a hralhna man hi a inang lo nuai a, Rs. 28-a lei chu a lei to ber dawttu niin Bor Axom-in Rs. 28 zelin kg. 10,068.45 an lei a. Kg-ah Rs 27-a lei leh Rs. 25-a lei an awm bawk a. Rs. 25 leh Rs. 30 inkara lei hi tlem azawng an ni a, anni hi a lei to pawl an ni. A lei tlawm berin kg. ah Rs. 3-in an lei a, a chung chiah chu Rs. 10 niin Rs. 10-a lei hi mi panga an awm a. A chung chiah chu Rs. 12 niin Rs. 12-a lei hi mi pakhat a awm a. Kg-a Rs. 14-a lei leh Rs. 16-a lei an awm bawk a ni.

Heng te hi Buffer Stock Point atanga hralhna rate a ni a, mi dang, Secondary Collection Centre atanga lei an awm bawk a. Secondary Collection Centre te hian anmahni-a a hralhna an ngaihtuah avangin an leina man hi hriat theih a ni rih lo a, Assembly Session-ah pawh khan a changtu Minister-in Secondary Collection Centre-a leite leh an lei zat te hriat a nih rih loh thu a sawi a ni.