India rama IMR hniam berah Mizoram a tel

Nausen kum khat hnuailam thi zat tehnaah Mizoram chu rampum huapa dinhmun tha ber a ni a, Infant Mortality Rate (IMR)-ah hian Sikkim leh Manipur te nen nau piang 1000 zela nausen 3 thi ang niin rampum huapa dinhmun tha ber an ni.

Zirtawpni khan National Health Mission (NHM) hnuaia RMNCHA buatsaihin Department of Planning & Programme Implementation Conference Hall-ah Review Meeting neih a ni a, hetah hian Mizoram chu India rama Infant Mortality Rate (IMR) dinhmun tha ber anih thu tarlan niin India sawrkarin Survey a tihchhuah hnuhnung ber Sample Registration Survey-ah chuan Mizoram IMR chu 3-ah dah a ni a, India ramah State 3 titha ber zingah a tel a ni. IMR hi nausen dama piang sang khat zela nausen kum khat hnuailam thi zat (Infant deaths per thousand live births) tihna a ni a; IMR 4 hi a tha hle a, India ram pum IMR chu 27 a ni. Tun tum SRS data hi 2021 data hmanga siam a ni. 

National Health Mission Director Dr. Lily Chhakchhuak chuan IMR target chu National Health Policy 2017 in kum 2025-ah chuan 16 aia sang lo tur leh SDG 2030 chuan 12 turin a rawn ti tih sawiin, Mizoram chu an tling sa tawh tih a sawi a, nu nau chunga thi tehna Maternal Mortality Rate (MMR) nikum-ah 18 an nei tih sawiin, Mizoram chu mi cheng an tlem avangin chhutsak an ni ngai lo niin a sawi a, nau chunga nu thihna uluk taka chhui thin anih thu a sawi bawk. He hunah hian NHM Director hian Sawrkar laipui buatsaih nau pai, nau pawm leh naute hriselna chungchanga hriattirna thawnna ‘Kilkari’ chu a tlangzarh a ni.