TCZP General Assembly Sailulak khua ah neih a ni

Tuichangral Zirlai Pawl (TCZP) General Assembly vawi 11-na chu tunkar Thawhtanni atang khan Sailulak-a Zakapa Hall-ah neih niin nizan khan zawhfel a ni.

TCZP General Assembly-ah hian ‘Tuichangral hmasawn nan zirna uar’ tih chu thupui atan hman niin nimin khan Hrangturzo Bialtu MLA leh Adviser to Chief Minister Lalmuanpuia Punte chuan khuallian niin a hmanpui a, Tuichangral mipuite chu Mizo Hnam Mizona vawng nungtu tha an ni tih sawiin, hei hi vawng nung zel turin a chah a. Zohnahthlak hnam hrang hrang chu Mizo vek kan ni tih pawh sawiin, kan tawng te humhalh a hman uar deuh deuh a tul thu a sawi a, “Kan hnam thuam hrang hrangte pawh chawinung a keimahni ngeiin inbel tama kan ngaihsan thar a tul hle, hnamdang zingah pawh vawrh lar kan tum tur a ni,” a ti.

TCZP General Assembly-ah hian an President Lalthawhsaka chuan Tuichangral Zirlai Pawl (TCZP) chu Tuichangral a zirna In ten hma an sawn theih nan theihtawp a hma la tawh thin leh hma la mek zeltu Pawl a nih thu a sawi a. He hunah hian David Lalrinchhana, Asst. Professor chuan ‘Tuichangral hmasawn nan zirna uar’ tih hmanga thu sawiin, General Assembly Uaptu leh MSU President B. Lalkhawngaihzuala pawhin thu a sawi bawk a ni.

TCZP huamchhungah hian khaw 14 awmin General Assembly-ah hian hruaitu thlanna an nei nghal a, Palai mi 200 vel an riaklut a ni.