Eng chiah nge tunlai hrileng an tih hi?

Eng chiah nge tunlai hrileng an tih hi?

- Dr. J.Lalramchhuanga MD

China ramah hri a leng an ti a, a hlauhawm em? tiin min rawn zawt a. Tin, Bengaluru a nausen thla 3 mi leh thla 8 mi bakah Ahmedabad-a nausen thla 2 mi ah HMPV an hmu tiin chanchinthar ah kan hmu chuai chuai bawk a. Kan lo ralkhel deuh a ni mai thei.

Tuna hri lêng mek a sawi HMPV (Human Metapneumovirus) hi virus thar a ni lem lo a, kum 60 kal atang tawh khan natna a thlen tawh niin mithiamte chuan an ngai a. Kum 2001 velah khan Netherlands-ah virus chi khat naupanga natna thlentu hmuh chhuah a ni a, he RNA virus hi kum 2016 khan Metapneumo Virus tiin an phuah a. He virus hian subtypes chi hrang hrang a nei a, heng ho hi an danglam nasa lem lo ni a sawi a ni.

He virus hi Respiratory Virus an ti a, a awmzia chu thawkna dáwt vela natna thlentu a nih vang a ni. Thawkna dâwt tuamtu (epithelial cells of respiratory system) a bei a, chu chuan kan thawkna dawt tivùngin, khâk a siam chhuak a. Hei hian thawk a ti harsa in thawchham a siam thei a ni.

A hrikte hi khuh leh hahchhiau zawnga phuhchhuah a ni a. Virus hrik in hritlang khawsik a thlen ang hi a nih dan tlangpui a ni a. Khawsik, taksa nâ/kham, lu na, hrawk thip, chau leh khuh te a siam thei. A hrik kai atanga ni 5 - 7 ah a natna a langchhuak tlangpui a. A hrik paite hian an kai atanga ni 5 - 7 velah virus hrik hi an khuh/phuh chhuak tam tlangpui a, hei hi midang an kaichhawn theih hun vanglai pawh a ni. A kai tam zawk daih te hi tlang hrilêng dang ang bawkin, enkawlna hranpa ngai lem lovin ni 7 -10 velah an dam ve leh mai thin. 

Kum tinin (a bikin thlasikah) khawvel hmun hrang hrangah a darhna fo thin a. Kum 2018 khan he virus hi naupang kum 5 hnuailam maktaduai 14.2 laiin an lo kâi tawh a ni. Chuvangin, natna tharlãm leh han chiai viauna tur a ni lem lo.

Tupawhin kan kai theih rualin, a bikin naupang kum 5 hnuai lamah leh kum upa te, natna benvawn neiten an kai samin an la na deuh bik. Enkawlna hranpa a awm lem lo a, tlang hrileng pangngai kan enkawl ang hi a ni tlangpui. Khawsik a awm chuan Paracetamol emaw a ei mai theih a, dehydrate loh nan tuiril lam in tam te a tha a. A serious leh enkawl ngai bik erawh damdawiin/ICU ah enkawl an ni ang a, doctor pan vat mai tur a ni. Khuh leh hahchhiau atanga inkaichhawn chi tho kha a ni a. Hritlang in midang kan kai loh nan Mask hmang tha ila. Naupang hritlang te pawh tar leh chak lo zawk ten awmchilh tam rih lo ni se. Naupang tan mask vuah a harsa a, puitlingin vuah zawk ta ila. Hand sanitizer hman that leh kut silfai a tangkai ang.