Loneitute hmunhma Drone hmangin enfiah a ni dawn

Digital Agricultural Mission-Aerial Survey of Agricultural Land hnuaia hmalakna chu Serchhip District-ah a hmasa ber atan kalpui a ni dawn a, Vawiin hian hemi atana Training neih a ni ang.

Digital Agricultural Mission-Aerial Survey of Agricultural Land chungchang ngaihtuah hian nimin khan Serchhip-ah Bawrhsap Paul L. Khuma hovin sawrkar mi pawimawh te chu DC Meeting Hall-ah an thukhawm a, he hunah hian Bawrhsap chuan Agriculture and Farmers’ Welfare Department atanga hriattirna an hmuh anga chawpchilh taka Meeting koh a nih thu sawiin, Serchhip District-a loneitute hmasawnna atan pawimawh tak Aerial survey neih a, an hmuhhma te eng ang nge a nih a, eng thlaite nge chin theih tihte ngun taka zirna tur chungchang ngaihtuah ho a nih tur thu a sawi a ni.

He hna thawktu tur M/s Theta Enerlytics Pvt. Ltd., New Delhi-a Chairman Colonel Anil Kumar Mehta (Rtd) chuan Digital Agricultural Mission kaltlang hian Mizoram-a loneitute nasa zawka hma an sawn theih a beiseiawm thu a sawi a, hmalakna hmasa ber atan Serchhip District chu thlan a nih thu a sawi a. He hmalakna hnuaiah hian loneitute dinhmun chiang taka zirin, an ram awm dan azira an hmalak dan turte enpui tur an nih thu a sawi a. Department hrang hrang- Agriculture and Farmers’ Welfare, Sericulture, Horticulture, AH & Vety leh Soil and Water Conservation Department hnuaia loneitute hmunhma chu Drone hmanga en a nih tur thu a sawi a. Survey atan inbuatsaih nan hian Vawiin, January 8, 2025 hian heng Department a thawktu tan hian DC Pisapui Hall-ah training buatsaih a ni ang.

He thutkhawm ah hian Addl. DC Lalrinzuala, SDO (Sadar) F. Lalnisai leh Settlement Officer Gaston Vanlalhriatpuia bakah SDC Dr. C. Vanlalchhanhimi te telin Sericulture, Horticulture, AH& Vety leh Soil and Water Conservation Department hotute an tel bawk a ni.