Serchhip District-ah TB enkawllai mi 32 awmin TB Free Village-ah in puan vek beisei a ni
Serchhip DC Meeting Hall-a District TB Forum thutkhawm hi an Chairman leh Bawrhsap Paul L. Khuma chuan kaihruaiin TB natna chuan kan taksa-ah a tha lo zawnga nghawng chi hrang hrang a neih theih avangin he natna hi kan ngaih pawimawh a tul thu a sawi a, he natna hi kan lo vei palh a nih pawhin tha taka damdawi ei chu a enkawlna awmchhun a nih avangin TB vei te pawhin TB damdawi ei an ngaih pawimawh a tul thu a sawi a. He natna vei te enkawlna kawnga thawktute inpekna pawh fakawm a tih thu sawiin, theihtawp chhuah zel turin a chah bawk.
He hunah hian District TB Forum-a Co-Chairman Dr. LP. Malsawma, Sr. CMO Serchhip District pawhin thu sawiin, Member Secretary Dr. Lallawmkimi Chhakchhuak, District TB Officer chuan December 9, 2024 atanga '100 Days TB Campaign' an kalpui chungchang tarlangin, he hmalakna hi Mizoram-a District 4, Serchhip, Mamit, Champhai leh Aizawl District-ah kalpui mek a nih thu leh kumin-a World TB Day, March 24 thlengin kalpui a nih dawn thu a sawi a. He hmalakna hnuaiah hian khaw hrang hrangah TB vei zawnchhuah hna thawh a nih thu a sawi a. Hei bakah hian mi tlawmngai te tanpuina atanga TB vei damlo ten chawtha an dawn theihna tur, 'Nikshay Mitra' hnuaiah Serchhip District chhungah mi pahnih in tanpuina an dawn mek thu pawh sawiin, mi tu pawh donor an nih theih thu leh thla sarih (7) chhung thla tin Rs. 600/- pein donor hi nih theih a nih thu a sawi a. Bawrhsap Paul L. Khuma leh DRDO Project Director Malsawmtluanga Fanchun te pawhin hemi pual hian tanpuina an pek tur thu he hunah hian sawiin, midangte pawh donor ni zel turin a sawm bawk a ni.
'TB Free Village' kalpui meka an hmalakna te pawh he hunah hian tarlangin, kum 2023-ah Serchhip District-a khua 11 leh kum 2024-ah khua 35 te TB Free Village-ah puan an nih tawh thu a sawi a, kumin a World TB Day-ah District chhunga khua zawng zawngte TB Free Village a puan hman beisei a nih thu pawh sawiin, TB Free Village ni tur hian mipui 1000 aia tam awmna khua ah kumtin mi 1000 zela 30 in TB an vei leh vei lo enfiah tur a nih thu te, mi 1000 aia tlem chenna ah chuan mi 25 enfiah tur a nih thu te, TB vei mi 100 zelah pakhat emaw, a aia tlem ah emaw tihhniam chu he hmalakna in a tum a nih thu te a sawi bawk.
He thutkhawm ah hian TB natna chung-changa Serchhip District dinhmun pawh tarlan niin kum 2024 chhung khan Serchhip District-ah TB vei mi 69 hmuhchhuah niin December thla thleng khan mi 37 te chu enkawl dam an ni tawh a, TB damdawi ei lai mi 32 awmin MDR TB vei mi pahnih an awm mek bawk a ni.
Comments
Post a Comment