ZORO in Zo Indigenous Indentity Card an tlangzarh

Zo Re-Unification Organisation (ZORO) in ‘Zo Indigenous Indentity Card’ an siam chu nimin khan Assemrbly Speaker Lalbiakzama chuan a Pisa-ah a tlangzarh.

Zo Indigenous Indentity Card tlangzarhna hunah hian Speaker Lalbiak-zama chuan Zofate hi UNO chuan Indigenous people-ah min pawm tawh tih sawiin, “UNO hian Indigenous people hi a ngai pawimawh hle a ni. UNO chuan hnam lian zawk leh chak zawk ten an awpbeh mek Indigenous People’s te chhan-chhuah an nih theih nan UN Declaration on the rights of people’s chu kum 2007 khan a lo siam tawh a. He UN Declaration hi keini Indigenous people’s te chuan kan hman tangkai thiam a tul hle a ni,” tiin UN thupuan - UN Declaration on the rights of people’s behchhana ZORO in Zofa Indigenous peole’s tana hman tur ‘Zo Indigenous Indentity Card’ an siam chu tha a tih thu a sawi a, “He Zo Indigenous ID hi Zofa ten kan dikna chanvo kan chan theih nan tangkai taka hman a nih ka ring tlat a ni,” a ti bawk.

He hunah hian ZORO General Secretary L. Ramdinliana Renthlei chuan Zo Indigenous Indentity Card hi sawifiahin, “Zo Indigenous Indentity Card hi UN thupuan - UN Declarations on the rights of Indigenous Peoples in kan dikna chanvo min pek Tualto hnamte a bik takin khawvel sawrkar ramri khamin a thendarh te chu an inkal-pawhin an inlaichinna tinghet tur leh intanpui tawn a tul pawhin an in tanpui anga, ‘Sakhaw thil leh khawtlang thil, ei leh bar leh politics-ah te anmahni mi leh sa te nen inpawh a, inpawlho theihna dikna chanvo an nei’ min tih angin kan dikna chanvo min siamsak kan zawmna tur atan a tangkai dawn a ni,” a ti a. “He Zo Indigenous Indentity Card hian kan nihna a ti chiang dawn a, ID nei apiangte chu khawvel ramri khamin a then Zofate India, Burma leh Bangladesh a awmte zalen taka inkalpawh a ti awl am thei ang,” a ti bawk.