Pro Fight-ah tel tum an tam

Mizoram-a Boxing inelna ngaihhlut hlawh Zudio LPS Pro Fight-a tel turin mi 322 zetin Entry Form an thehlut a, October 28 khian LPS Arena, Falkland-ah inbukin tel tur zat dik tak hriat theih a ni ang.

LPS Pro Fight-a tel tumte tan hian September 23 atangin LPS Office, Zarkawt-ah lehkha thehlut tanin Inrinni thleng khan hun hawn a ni a, Weight lian pahnih ah Boxer 65-in form theh an lut a, a rit ber Middle-ah 23 niin an tlem ber a, Weight te pathum - Fly, Bantam leh Light-ah tel tumin boxer 257-in an inpelut a ni. Kumin a LPS Pro Fight-a tel tum zingah hian State thenawm Lamka, Manipur atangin boxer pasarih, Meghalaya atangin pali, Assam leh Myanmar atangin boxer pakhat ve vein lehkha an thehlut a. Mizoram pawn atangin boxer 10 chuangin tel an tum a ni.

Ruahman lawk ang chuan October 28, 2024 zing dar 8:00 atanga chhun dar 12:00 thlengin LPS Arena, Falkland-ah heng hming pelut te hi an hriselna endik hmasain an inbuk dawn a, hemi hnu hian tel a tur zat dik tak a hriat dawn a, October 31-ah LPS Office-ah fixture tarchhuah a ni ang. November 1 zan-ah LPS Arena-ah tanin December kar khatna thleng a awh dawn a, weight hrang pangaah lawmman Rs 6,50,00 semchhuah a nih dawn bakah KT Enterprise-in Boxer, Referee leh Judge tithate chawimawina tumsakin GIG Motors-in Fighter of the Night lawmman a tum dawn bawk a ni.