Sawrkar in a intiamna te tih hlawhtlin ngei a tum thu Chief Minister in a sawi nawn leh

Chief Minister Lalduhoma chuan sawrkar chak, langtlang leh hmasawnna kawnga theihtawp chhuah tura an intiamna te tih hlawhtlin ngei an tum tih sawi nawnin, mipui tana a tha ber tur ngaihtuah chungin an sawrkar chuan hna a thawk chhunzawm zel dawn tih a sawi.

Ram zalenna kum 78-na lawmna pui ber nimin-a Aizawl Lammual-a neih ah Hnam Puanzar a pawhparh hnuin mipuite hnenah thuchah a sawi a, he hunah hian Chief Minister chuan an sawrkar chunga Mizoram mipuiin rinna an nghah ngam avangin lawmthu a sawi a; an beiseina leh duhthusam tihlawhtling turin tha thlah lovin theihtawp an chhuah zel dawn tih a sawi a. Tun Sawrkar hi thla riat chauh a upa la ni mah se, rorelna leh inrelbawlnaah danglamna tam tak hmuh tur a awm tawh niin a sawi a. Mizoram ei leh bar leh sum dinhmun chawikang turin hmabak tam tak a awm tih an hriat thu sawiin, an sawrkar din tirh atang khan sum dinhmun sawh nghet a, siamtha turin hma an la nghal tih a sawi a. Hemi kawnga sum hmuh leh hmanral inbuk tawk nei tura sum enkawl dan felfai tak neih leh inrenchemna an kalpui chu chhunzawm zel a ni ang, a ti a. Chutih rual chuan Contract Employee kum 15 chuang lo thawk tawhte leh Provisional Employees leh Muster Roll kum 20 chuang lo thawk tawhte dah nghehna tur chu pawm a ni tawh tih sawiin, Centrally Sponsored Scheme hnuai a thawkte pawh an ngheh theihna tura ruahmanna duan pawh pawm a ni tawh thu leh sum dinhmun khawih thei thil ni mahse hun rei tak lo thawk tawhte hi an dinhmun en hian dah ngheh an phu thu a sawi a ni.

Lalduhoma chuan nikum December ni 8-a sawrkar thar an din tirh khan ni za chhunga tihhlawhtlin tur hmachhawp hrang hrang, Chief Minister's 100 days programme an puan thu a sawi a. Khang te kha tunah chuan tha takin an tihlawhtling tawh niin a sawi a. He mi hnuaiah hian thlai thlan bik te hlawk zawka hralh a nih theih nana hma latu tur Agricultural Market Assurance Fund Management Board (AMAFMB) din chu hmalakna pawimawh tak pakhat a ni, a ti a, Revised Estimate 2023-2024 angin hemi atan hian cheng vbc. 110 dah fel a ni, a ti.

An Sawrkar hnuah Electric Bill ba tlingkhawm cheng vbc. 448 pek tlak a nih tawh thu leh a huna pek loh avanga chawi tur (Surcharge) cheng nuai 58 chawi a ngaih loh phah mai bakah a hun taka pek a nih avangin hamthatna (Rebate) cheng nuai 35.25 hmuh let a ni tih a sawi a. Hun rei tak chhung Healthcare Bill lo tang tawh rulh nan an sawrkar tirh khan cheng vbc. 50 chuang zet pek a nih thu leh pension sum ba, rei tak tlingkhawm tawh rulh na'n cheng vbc. 256.75 pekchhuah tawh tih a sawi a, sawrkar tharah K-deposit a bill hrang hrang tang cheng vbc. 425.49 pekchhuah a nih thu leh GPF lakchhuah theih loh avanga sawrkar hnathawkte harsatna tawh thin hriatpuiin, June thla thleng khan cheng vbc. 359.89 pekchhuah tawh tih a sawi a, MLA Fund First Installment atan cheng vbc. 40 pekchhuah a nih thu leh Sawrkar hnathawkte hlawh chu thla tira pe zel turin theihtawp chhuah a nih thu a sawi a, sawrkar hnathawk hlawh atan hian thla tin cheng vbc. 330 bawr vel leh Pension hlawh cheng vbc. 82 bawr vel pekchhuah thin a ni tih a sawi bawk.

Chief Minister chuan sawrkar Flagship Programme Hand Holding Policy ‘Bana Kaih’ Sector hrang hrangte tihchakna atan hman a nih dawn thu a sawi a. He hmalakna pawimawh tak hnuaiah hian kuthnathawktute thei leh thlai tharchhuah lei sakte, a sawngbawl dan tur ngaihtuah te, a hralhchhuahna kawng dap te bakah mahni kutkawih eizawnna leh thiam thil zirna chawisan te, thalaite tana eizawnna ngelnghet siam thlengin a huam tel a ni, a ti a. Hei hian Small Scale leh Agro-Based Industry-te hmasawnna a pui hle dawn bawk niin a sawi bawk.