Tlawng lui-a Vawk thi paih thu ah FIR thehlut

Nimin zing khan Hortoki bul Tlawng lui-ah Tlawng hnar lam atanga Tui in a len Vawk thi ruang hmuh a ni a, Vawk thi hi kar kalta tawp lamah pawh hmuh anih tawh thu Hortoki Vawk Vulh Association President Zoramthara chuan a sawi a ni.

Tunkar Thawhlehni khan Hortoki khaw mi Tlawng hnar lama hnathawka kal te chuan Vawk thi (ruang) hi 7 vel an hmu niin thudawnna pakhat chuan a sawi a, Vawk thi an hmuh tawh zawng zawng hi 10 vel anih an rin thu an sawi a ni. Tlawng hnar lam atanga Vawk thi lenthlak te hi Hortoki khaw kai-ah a tangkhàn loh nan Mau tlawn in lui mawng lamah hawlh thlak a ni thin a, Tui in lui mawng lamah a len thla zel niin thudawnna chuan a sawi a. Hetiang hi thil awmdan anih avangin Lui mawng lama chengte an fimkhur a ngai hle a. Tun dinhmunah Vawk thi te hi a paihtu hriat a ni rihlo.

Hortoki Vawk Vulh Association President Zoramthara chuan, Tlawng lui-a Vawk thi len thlak chungchangah hian Mizoram Pig Farmer Association President hnenah thil awmdan phone hmanga hrilhin, Vawk thi thlalak thenkhat pawh a thawn tawh thu a sawi a. Hemi bawhzui hian Mizoram Pig Farmer Assn hruaitute chuan Sairang Police Station-ah FIR an thehlut nia hriat a ni bawk.

Animal Husbandry and Veterinary Department chhinchhiah danin nimin khan Mizoram-ah vawk pulhri, African Swine Fever (ASF) vangin Vawk 106 thiin Vawk 218 suat a ni leh bawk a. ASF vang hian Mizoram-ah kumin January thla atanga nimin thleng khan Vawk 5427 thi nia report a ni a, Vawk suat tawh zawng zawng hi 10258 a ni tawh a. Nimin bika Vawk thi zat hi Aizawl District-ah Vawk 55 a ni a, Serchhip District-ah Vawk 50 leh Kolasib District-ah Vawk pakhat a ni a. Hetihian nimin-a Mizoram chhunga Vawk thi zat hi vawk 106 a ni. Nimin vek khan Mizoram chhungah Vawk 218 suat a ni a, heng te hi Aizawl District-ah Vawk 144, Serchhip District-ah Vawk 52, Kolasib District-ah Vawk 4 leh Khawzawl District-ah Vawk 18 te a ni.