Kuhva rah tawlhtute mit siai khum ah ZPM puh

MNF party chuan ZPM Sawrkarin Kuhva rah tawlhtu an party mite laka mit an la siai khum zel chu bansan thuai se an duh thu an sawi.

Nimin a thuchhuah an siamah MNF Party chuan tunhnaia Vairengte leh a chhehvela Kuhva rahro bothlau zawnchhuah tuma hmalakna kal zelah July 7, 2024 khan Mizoram Police te chuan Phaisen-ah 407 trip khat leh an lakchhuahna Kudam atangin bag 145 vel man chhuah a nih thu puanzar a ni tih sawiin, he kuhva neitu nia rin hi Lalchhuanliana, Ruantlang a nih thu tarlan a ni tih an sawi a. “Lalchhuanliana, Ruantlang hi ZPM Champhai ‘S’ Block Information Jt. Secy. nia hriat a ni a, a unaunu hi Ruantlang ZPM VC member niin, a unaunu pasal hi ZPM Champhai ‘S’ Block President nia hriat a ni bawk,” tiin Phaisen a kuhva lo chheprelh saktu pawh hi Laltanpuia, Phaisen ZPM Secretary a nih thu leh an Inhnuai Kudam atanga manchhuah a nih thu hriat a ni bawk tih an sawi a. “Heta tanga langchiang tak chu an sawrkar atanga thlakhat chhunga dan lova bungraw tawlh tihtawp tum ZPM sawrkar hian tihtawp chu sawi loh, a tawlh thin tute zinga ZPM mi leh sa chu an mit an la siai khum zel tih a tilang chiang hle mai a. An thil chin tenawm tak hi bansan thuai se kan duh takzet a ni,” an ti.