Damlo tamna Dengsur khua ah inentirna buatsaih

Lunglei District-a Dengsur khua ah Acute Febrile Infection (AFI) vangin an khuaa cheng zinga za zela 70 vel zet chu an damlo a, hei vang hian niminpiah khan he khua ah hian damlo te enfiah runpui neih a ni.

Lunglei District-a Dengsur khua ah hian mi 780 vel khawsa mekin March ni 25, 2024 vel atang khan Hritlang âwmna, Khawsik leh ruhchuktuah nâ inkawp natna a hluar hle a, a khaw chhunga cheng mi 500 vel zetin he natna hi tuarin kum upa lam, Thawhah nei mi pakhat chu March ni 30 khan a boral bawk a. Dengsur khuaa natna leng enfiah tur hian Lunglei-a Chief Medical Officer hmalakna in Senior Medical Officer Dr. Isaak Lallawmsanga leh thawktu te chu niminpiah, Easter Sunday khan he khua ah hian kalin damlo endik runpui an buatsaih a, damlo 300 chuang an endik a, a mamawh te hnenah a thlawnin damdawi sem nghal a ni bawk.

Senior Medical Officer Dr. Isaak Lallawmsanga chuan Dengsur khuaa natna leng mek hi eng natna nge hriatfiah chiah loh, Acute Febrile Infection (AFI) an tih ang chi a ni tih sawiin, naupang leh kum upa lamah a thawk na deuh nia a lan thu leh Hritlang âwmna khawsik bakah Thazâwi nei te pawh an awm thu a sawi a, damlo an enfiah zingah hmunpui lama refer ngai an awm loh thu sawiin, he natna hi darh zau zel turah a ngai lem lo tih a sawi a. heng damlo te hi Covid test neih a nih thu leh COVID-19 kai hmuh an awm loh thu a sawi a, thisen an enfiah te zingah rannung seh (Scrub Typhus) mi 4 leh Typhoid pahnih hmuhchhuah an nih thu sawiin, midang ah chuan natna bik hmuhchhuah a awm loh thu a sawi bawk. He khua a damlo engemaw zat chuan inenkawl turin Buarpui leh Thenzawl te an lo pan tawh bawk a ni.