Central nena tha taka thawhdun kan duh - Lalduhoma

ZPM Leader leh Chief Minister Lalduhoma chuan Central nena tha taka thawhdun an duh tih sawiin, “Kan ram, kan hnam leh Sakhaw tana him lo thilah chuan huai takin kan dodal mai dawn a ni,” a ti.

Lok Sabha MP Election Campaign bultan inkhawm nimin-a Aizawl Vanapa Hall-a neih ah ZPM Leader Lalduhoma chuan ZPM chuan Delhi tlang-ah zawmpui an nei lo tih sawiin, “Hei hi kan danglamna a ni,” a ti a. “Issue based-in Parliament thurel pawh a thlawpin a thlawp lo mai dawn a, hei hi kan tan chuan a him ber a ni,” tiin “Central nena tha taka thawhdun hi kan duh a, amaherawhchu kan ram, kan hnam leh Sakhaw tana him lo thilah chuan huai takin kan didal mai dawn a ni,” a ti bawk. ZPM chu Tualto party an nih avangin tuna an dinhmunah hian an chiang tih pawh Lalduhoma chuan sawiin, “Kan awm reng dawn a ni,” a ti a. “He kan dinhmun hi chiang taka min hriatsak turin mipute pawh ka ngen duh a ni. MP hi palai hna thawktu tur a ni a, a tirtu Mizoram sawrkar nena thawkdun thei a ni dawn a, project umzui ngai a tam hle thin a, hetiang bawhzui tur atan hian MP tha kan mamawh a ni,” a ti.

Zofate hmun hrang hrangah kan inzar darh nasa ta hle tih pawh Lalduhoma chuan sawiin, “Hengte enkawl thei tur hian MP tha kan mamawh hle a, MP tawng lama harsatna nei lo, hnamdang kara lo khawsa reng tawh leh hre em em mai MP Candidate kan nei hian hmasawnna kawng tinrengah nasa takin kan tangkaipui ngeiin ka ring a, kan ramin a mamawh tak MP min thlantlin sak turin Mipuite ka sawm a ni,” a ti bawk.

He hunah hian ZPM President Lalliansawta chuan Campaign Kick-off hun hi hmangin ZPM Party Lok Sabha MP Candidate Richard Vanlalhmangaiha chuan, “Zoram mipui hian ZPM hi enchhin min tum lova, en tak tak min tum a ni,” tiin “Mipui ten min beisei anga hna pawh kan thawh ngei ngei a ngai a, kan ram enkawl hna hi Pathianin kan kutah a dah a, a malsawm tlaka enkawl pawh kan tum tur a ni,” a ti a. MP te chu Central leh State inkar Palai tur an nih thu sawiin, “Pathian zara ka lo tling a nih chuan he hna hi rinawm tak leh tha taka thawh ka tum a ni. Central atanga Project leh Scheme hrang hrang a tam thei ang ber haichhuah kan tum dawn a Pawisa hi dik taka hman atan chuan central hian a ui reng reng lova, rinawm taka hnathawh chuan Project haichhuah leh hmasawnna thilah harsatna a awm dawn lo a ni,” a ti bawk.

Richard Vanlalhmangaiha chuan House chhungah a ni emaw, House pawnah a ni emaw kan ram, kan hnam leh kan Sakhae tan theihtawp a chhuah dawn thu pawh sawiin, “Ka thisen far tawp thlengin ka ding dawn a ni,” a ti a. Lok Sabha Inthlanpui a Vote thlak theuh turin mipuite chu a sawm nghal bawk a ni.

Comments

Popular News (Last 30 Days)

A hun pangngai ah Pavalai Intawhkhawmna neih tum a ni

LPG man bithliah thar a ni