India ram Democracy chhanchhuah a ngai niin sawi

Mizoram Pradesh Congress Committee (MPCC) Vice President Lalnunmawia Chuaungo chuan India ram Democracy chu chhanchhuah a ngai niin a sawi.

MPCC Campaign Committee-in nimin-a ‘India Ram Democracy Chhanna Rally’ Aizawl Israel Point-a an buatsaih ah MPCC Vice President leh MPCC Campaign Committee Chairman Lalnunmawia Chuaungo chuan India ram Democracy hi chhanchhuah a ngai tih sawiin, “BJP leh a thawhpui te rorel dan kan hria, a hrechiangtu chu kan Missionary te leh kan Kohhran hruaitute an ni. BJP sawrkar hnuaiah hian Election hi ralmuang leh dik taka neih a ni thei tawh lo hial dawn a ni,” a ti a, tunah hian MP inthlan hi dik lo taka hmachhawn pui min tum mek niin a sawi bawk a. “India rama BJP kaihhruai NDA paihthla thei tu chu INDIA Bock te hi an ni a, an dinhmun an hre tawh a, chuvangin dik taka kan inthlan chuan an chak dawnlo tih an hria a, tunah hian Congress chakna tichhiat an tum mek a, an sum leh pai neih pawh Income Tax Department te hmangin an bei mek a ni. Congress Party account 11 zet chu khawih chet theih lohvin an hreng mek a, sum tam tak an chhuhsak bawk a ni,” tiin “Hetia an tih chhan chu Congress party hian sum kan neih loh chuan kan campaign thei dawn lova, Campaign thei lova min siam an tum a ni,” a ti bawk.

MPCC Campaign Committee-a Chairman chuan Modi-a sawrkar chu Campaign laia an auhla ber, thalaite tana hna siam leh ram pawna thalai thawnchhuah te chu a hlawhchham nia sawiin, “India ram thalai 65% hi hna neilo an ni mek a, tunah phei chuan sawi pawh an sawi ri ngam tawh lo a, thalai hna neilo te BJP sawrkar lakah hian an beidawng em em a ni. Inthlan hmasa a an voters te kha thalaite an ni a, tunah chuan an beidawng tawh a, an vote tawh dawnlo a ni,” a ti bawk.

He hunah hian Congress hruaitu leh MLA hlui Vanlalawmpuii Chawngthu pawhin BJP leh a sangawi zawnpui NDA te chu kan ram leh hnam, kan Sakhua humhim nan kam paithlak a ngai tawh tih sawiin, “Democracy ram, India ramah hian democracy chu a bo mek a, rahbehin a lo awm ta a. A ram mipuite kan rum mek a ni. Kan Sakhua a zalen tawh lova, Hnam hnuaihnung te rahbehin kan awm mek a ni. BJP leh a thawhpui te hian Hindu lal ramah min siam an tum a, tan an la mek a ni,” tiin mipui ten kan ngaihtuah chiana kan harh a ngai tih a sawi a. “Tun tuma kan inthlang tur hi inthlan pawimawh tak ani tih i hria ila, Congress kan vote lo anih chuan Narendra Modi hnuaiah kan awm leh dawn a, kan ram, kan hnam, kan Sakhua a him leh dawn lo a ni. Chuvangin kan ram, kan hnam, kan Sakhua humhim nan Congress Candidate I vote vek ang u,” a ti bawk.