Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

Serchhip District-ah kumin hian TB vei 60 hmuin Nikshay Mitra hnuaiah mi 10 chauhin tanpuina an la hmu

Serchhip District-ah kumin (2023) chhungin mi 867 te enfiahna atangin TB hrik pai mi 60 hmuh an ni tawh a. Serchhip District chhunga TB hrik pai mi 10 te hnenah Nikshay Mitra kaltlangin chawtha an eina tur pek mek niin mi tam zawkin an dawn theihna turin mi tlawmngai te penchhuak tura an duh thu thawktute chuan an sawi.

Serchhip District TB Officer Dr. Lalnunhlima Khiangte chuan nimin khan Serchhip Press Club-ah Serchhip District-a MJA Member te kawmin National TB Elimination Programme (NTEP) chungchanga an hmalakna te a sawipui a. Serchhip District TB Officer chuan TB hi chi hrang hrang a awm thu leh ‘mihring taksa-ah TB thei lo a awm lo’ tih theih hial a nih thu sawiin, Serchhp District-ah pawh Microscope leh CBNAAT hmangin TB hrik pai leh pai lo enfiahna hi kalpui mek a nih thu a sawi a. Microscope hmang hian kumin chhungin September thla thleng khan Sample 449 enfiahin CBNAAT hmangin Sample 418 enfiah anih thu leh heng ataang hian TB hrik pai mi 60 hmuh an nih thu a sawi a. TB hri kai enkawl dam mi 61 an awm thu leh mi 2 in an boral phah thu a sawi a. Nikum lama TB hrik pai hmuhchhuah mi 58 te zingah enkawl dam engemaw zat an awm avangin enkawl dam zat hi an tam thu leh tun dinhmunah TB kai enkawllai mi 60 an neih mek thu a sawi a. An zinga mi 5 te chi HIV leh TB pai kawp an nih thu sawiin, kumin chhunga TB pai an hmuhchhuah zingah hian TB dam har chi an tih mai, PMDT, MDR-TB an tih bawk mi 3 an awm thu a sawi bawk.


District TB Officer chuan kum 2030-ah khawvel pumah TB umbo tuma tanlak a nih thu leh India ramah chuan kum 2025-ah umbo tum a nih thu sawiin, TB kai damlo te hi enkawlna a hautak bakah chawtha pek an mamawh avangin sawrkar laipui chuan TB hri pai te hi Rs. 500/- zel a pek thin thu a sawi a. Hei bakah hian chawtha leina tura mi tlawmngai ten sum leh pai an thawhna tur, Nikshay Mitra (Community support to TB patient) chu India rampumah kalpui a nih thu leh damlo pakhat tan thla tin Rs. 600/- zelin thla ruk (6) chhung zel atan tum sak theih an nih thu a sawi a. Tun dinhmunah Serchhip District-ah hetiang tanpuina dawng hi mi 10 an awm mek thu leh Serchhip bikah mi pahnih chiah hetianga sum thawh thei hi an la awm thu a sawi a. Mi tlawmngai te penchhuak zel tura an duh thu a sawi bawk a ni.

TB umbona tura hmalakna kal zelah ‘TB Mukt Village Council’ chu kalpui mek a nih thu pawh District TB Officer chuan sawiin, hemi atan hian July 8, 2022 khan Ministry of Panchayati Raj (MoPR) leh Central TB Division, Ministry of Health and Family Welfare (MoH&FW) te chuan Memorandum of understanding (MoU) ziakin VC te chu an huamchhunga TB a awmlohna tura hmalakna tur hrang hrang ruahman a nih thu a sawi a. Hemi ang hian Serchhip District-ah pawh khaw 11- Vanchengte, Sialhau, Hmunzawl, Hmuntha, Khawbel, Bawktlang, Thinglian, Zote South, Buangpui, Neihloh leh Piler te thlan an nih thu a sawi bawk.

Heng TB Mukt Village Council atana an thlanchhuah ah te hian kumtin mi 1000 zelah mi 30 in TB an vei leh vei loh enfiah tur niin kumtin mi 1000 zelah TB vei hmuhchhuah mi pakhat emaw, a aia tlem-ah emaw tlak thlak tir tum tur a ni a, tunah hian khaw 8-ah hmalakna zofelin nakum March 24-a ‘World TB Day’ hman turah lawmman sem hman tura ruahman a ni bawk.

TB enkawlna kawnga thawktute chuan TB kai leh kai lo enfiahna hi Mizoram hmun-dang ah pawh Serchhip-a khawl awm aia tha a awm bik lo tih sawiin, TB kai hmuchhuah te hian an damdawi ei tur ang te tha taka an ei-a natna dang in a tlakbuak emaw a nih loh chuan an damdawi ei hun chhungin an dam ngei ngei tih an sawi a, damdawi ei that chu damna tura pawimawh ber a ni tih an sawi bawk.

Comments

Popular News (Last 30 Days)