YMA Inkhawmpui Lian thlirlet

Serchhip Sub-Hqrs. YMA chuan nimin khan Sub-Hqrs. YMA Execuitve Committee (SEC) thutkhawm neiin YMA Inkhawmpui Lian neih zawh tak an thlirlet.
Nimin-a SEC thutkhawm Serchhip Sub-Hqrs. YMA Conference Hall-a neih hi an President Kawlthuama chuan kaihruaiin Oct. 24-26, 2023 chhunga Biate-a YMA Inkhawmpui Lian neih zawh tak hun chep tak kara hlawhtling taka neih a ni leh Biate khua in hneh taka an thleng chu lawmawm an tih thu sawiin, an inbuatsaihna tha an tih thu te an sawi a. Faina kawnga an hmalakna te chu entawn tlak an tih thu sawiin, an ngaih pawi-mawh thil hrang hrangte an sawichhuak bawk.

SEC thutkhawm ah hian Oct. 31, 2023-a SEC Member leh Serchhip Sub-Hqrs. YMA Sports & Recreation Committee Secretary boralta C. Laldinpuia sunna hun hman niin hetianga a boral tak avang hian a aiawh tur chu OB ten lo ngaihtuah se an ti a. Hei bakah hian CCC Meeting neih tura Serchhip Sub-Hqrs. YMA aiawha kal turte pawh OB ten lo ngaihtuah se an ti a. Ruihhlo dona kawnga an hmalakna te leh Committee hrang hrangte hmalakna ngaihthlak a ni bawk.

Nimin-a SEC thukhawm hian boruak nuam tak hnuaia Krismas leh Kumthar mitin ten an hman theih nan Branch tin ten mahni huam-chhung theuhah hmalak nise an ti bawk a. Duty Post siam chungchang erawh Branch ten tul leh tha an tih angin thutlukna lo siam se an ti bawk.