Serchhip District-a Bial 3-ah tluang takin Vote thlak

Mizoram Legislative Assembly Inthlanpui chu nimin khan Serchhip District chhunga Assembly Constituency pathum-ah te pawh tluang taka neih a ni.
Serchhip DC Office atanga thu kan dawn danin nimin zing dar 7:00-a Vote thlakna hun hawn a nih hnuah Polling Station thenkhat ah Vote thlakna khawl a harsatna thleng avanga Vote thlak nghal theih loh awm mah se harsatna thleng zui lovin tluang taka Vote thlak a ni a. Khawi hmun atang mahin harsatna leh buaina thleng a awm thu dawn a ni lo. Hmun thenkhat ah Vote thlak laklawh laia khawl lama harsatna awm te pawh awm mah se Engineer ten Vote thlak hi an vil reng avangin harsatna lian a thleng zui lo nia thudawn a ni bawk.


Serchhip District chhunga Polling Station hrang hrangah Vote a tla tha thawkhat niin a lang a, 26-Serchhip (ST) AC-ah vote nei mi 20,647 atangin mi 17,447 ten Vote thlakin Vote za zela 84.5 a tla a. 27-Tuikum (ST) AC-ah Vote nei 16,931 zingah mi 14,784 ten Vote thlakin Vote za zela 87.32 a tla a. 28-Hrangturzo (ST) AC-ah Vote nei 16,688 atangin mi 13,778 ten Vote thlakin Vote za zela 82.56 a tla bawk a ni. Vote tla zat hi Ballot Paper-a tla zat hriat a nih hunah tun aia la pung leh tura beisei a ni.
Nimin tlai-a Vote thlak zawhfel a nih veleh Polling Prty te hian Serchhip DC Office pankhawm nghalin Vote thlakna bungraw hrang hrangte hi dahfel nghal a ni a, nizan dar 11:00 pelh hnu hret khan Polling Party te hi Serchhip DC Office-ah rawn thleng felin Vote thlakna khawl, EVM leh VVPAT te hi Strong Room-ah dahluh nghal zel a ni a, heng te hi venhimna hnuaiah dah zui nghal niin Inthlanpui Vote chhiar ni tura rua-hma ah lakchhuah leh a ni dawn chauh a ni.
Nimin-a Vote thlakna hmun hrang hrang te hi Serchhip District-a Observer leh Sector Officer te chuan a hmunah tlawhin uluk takin an vil reng bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar