ZMC-a MBBS zirlai result hmasa ber tichhuak ta

Zoram Medical College (ZMC)-a MBBS zirlai hmasa ber (2018 batch) te result chu nimin khan tihchhuah niin Health Minister Dr. R. Lalthangliana chuan ZMC-in chanchin lawmawm tak a nei chu Mizoram tan mellung pawimawh tak a nih thu a sawi.

Zoram Medical College (ZMC) Director in nimin-a ZMC-a zirlai hmasa ber te result a tihchhuah ah hian Exam beitu zirlai 95 zingah mi 68 ten hlawhtlinna changin, pass percentage hi za zela 71.57 a ni a, a pumpui-ah Lalrempuii Hmar chu pakhatna a ni a, F. Vanlalchhuanpuia chu pahnihna niin Ruth Lalrinawmi chu pathumna a ni bawk a, midang 27 an Fail thung.

ZMC-aMBBS zirlai hmasa ber chungchangah hian Health Minister Dr. R. Lalthangliana chuan thuchah siamin Zoram Medical College-in chanchin lawmawm tak a nei chu Mizoram tan mellung pawimawh tak a nih thu a sawi a. Sawrkar hmasain theihtawp chhuaha bul a lo tan tawhna ah lawmthu sawiin, Medical College puitlin nan tun sawrkar pawhin theihtawp a chhuah thu a sawi a. COVID-19 hripui vanga hun harsa leh khirh tak Mizoram in a hmachhawn karah ZMC chu Dedicated Covid Hospital-ah puan niin, hemi avang hian MBBS zirlaite pawhin harsatna tam tak an tawk tih Minister chuan a sawi a. Harsatna tam tak kara hlawhtlinna chang zirlaite chu a lawmpui thu sawiin, tun tuma hlawhtling ta lo te tan Mizoram University-in exam a buatsaih leh thuai tur thu a tarlang nghal bawk.

MBBS zirchhuak thar ten Internship an tan thuai theih nan sawkarin hma a lak mek thu Health Minister chuan sawiin, National Medical Council-te nen indawrna kalpui mek a ni, a ti a. Hei hian nakum lamah chuanDoctor indaihlohna pawh engemaw chenah a phuhruk ngei a beisei thu Health Minister hian a tarlang nghal a ni.