Sports Complex lung phum

Sports & Youth Services Minister Robert Romawia Royte chuan nimin khan Lawngtlai District chhung Mampui khuaa Lawngtlai District Sports Complex sakna tur lungphum a phum a, sawrkarin infiamna hmunhma tha awm lohna ah hmunhma tha buatsaih tura ruahmanna lian tak tak a kalpui thu a sawi bawk. Lawngtlai District Sports Complex sakna atan hian Sawrkar laipui Ministry of Minority Affairs hnuaia Pradhan Mantri Jan Vikas Karyakram (PMJVK) atangin cheng nuai 5,019.43 approval dawn a ni a, zaa 90 (cheng nuai 4,517.49) chu Central sawrkar tum tur niin zaa 10 (cheng nuai 501.94) chu State sawrkar tum tur a ni thung. District Sports Complex hi Lawngtlai atanga km 20 vela hlaa awm, Mampui khaw bulah sak tura ruahman a ni a. A sakna tur hi Central atangin 1st instalment (cheng nuai 2,258.74) dawn tawh niin Tender tihchhuah tawh a ni a, a thawk turin M/s Decor India, Guwahati te thlan an ni.