Tomato ti tawih lo turin Tualte an insiamrem mek

Mizoram-a a khaw mal-a Tomato thar tam, Tualte khua chuan kumin ah an Tomato thar an ti tawih nasa tih sawiin, dah tawih lo turin an insiamrem chho tan mek nia sawi a ni.

Thudawn danin Tualte khuaah hian Tomato chingtu chhungkaw 200 chuang an awm a, kartin Tomato hmin quintal 300 vel lo anga ngaih theih a ni a. Mizoram hmun hrang hrangah an Tomato thar hi an thawnchhuak naa Phai Tomato a awm ve bawk nen an hralhchhuak hneh lo hle tih an sawi a. June thla tir lam khan Commerce Department, Tualte Tomato Growers’ Co-operative Society Ltd. leh Aizawl-a Tomato commission-tute an inhmukhawm a, Phai Tomato lakluh hi tihtawp dan kawng zawn an rel a ni.

Tualte khuaa an Society hruaitute chuan an tharchhuah engemaw zat an hralh chungin tunhnaiah a hmin lawh tur a tam hrim hrim niin an sawi a. June 6 khan quintal 400 chuang an lo a, quintal 162 chu Silchar-a zawrh tura phurhchhuah a ni a. An khuaa la dah ban quintal 100 vel la awmin, Khawzawl-a Cold Storage-a dah tumin paih ngai a tawih awm tawhte an paihfai hnuah quintal 40 chu Cold Storage-a dahthat theih an la hrang a, a dang zawng hi Dumping Ground-ah an paih tih an sawi a. “Tomato hi a hrisel leh hrisel loh azirin a that rei theih leh theih loh a hril a, a rah a hrisel chuan rei tak pawh a tha thei tho. Kumin ah ruah in min nuai na a, hei hian a kawr a ti pan a, a chhe hma a ni. Kan lawh leh hunah hi chuan a hel deuh kan lo thei tawh anga, kan insiamrem chho thei tawh turah kan ngai,” tiin Tualte Tomato Growers’ Co-operative Society Ltd. President R. Lalchhanchhuaha chuan a sawi.

Silchar-ah hian kar kalta lam khan a enchhinna atan tum khat an thawn thla a, June 8 khan a tum hnihna atan an thawn thla leh a, a lo buaipuitu hi Mizoram-a phai thlai rawn laluttu lian Hussein-a, Silchar niin ani hian a Kudam a hmantir bakah a hralhna a buaipui a, hemi atang hian commission a lo la ve a ni. An thawn thlak hmasak zawk hi Kg. ah Rs. 40 vela an lei theih laiin, tun tuma an thawn erawh heti zat hi chu an lei phak an ring tawh lo, hralh erawh an hralh zo hnai tawh tih an sawi a ni. Tum khatah Tomato crate (plastic bawm) 200 (crate khatah tomato kg. 20 zel a awm) aia tam an khawih thei lo tih an sawi bawk a. “Tun thleng chuan Silchar emaw, a bulhnai emaw a tomatoa sumdawngte atang chuan harsatna an tawh sawi tur kan la hre lo a, Silchar ho Tomato lakna Goalpara leh Shilllong Tomato ai chuan tha an ti zawk, tih chu an rawn sawi dan a ni,” an ti bawk. Silchar-a Tomato thawnna man hi anmahni tum vek a nih thu leh a dahna plastic bawm - crate hi hralh tel nghal zel a nih avangin a thar pakhat Rs. 50/- lei zel a ngai tih an sawi a, Manipur lama thawn dan tur an ngaihtuah mek tih an sawi bawk.