Skill Development kalpui chungchang thlirho

Mizoram chhunga Skill Development kalpui tura din, Mizoram State Skill Development & Entrepreneurship Mission hnuaia State Executive Committee thutkhawm hmasa ber chu Zirtawpni khan SAD Conference Hall, MINECO-ah neih a ni.

He thutkhawm ah hian LESDE Secretary leh State Executive Committee Chairman Lalramsanga Sailo chuan Skill Training hmanga mihring hmantlak chherchhuah chu mimal leh ram din chhuahna bul, ram hmasawnna hnuk pawimawh tak a nih thu a sawi a. LESDE Dy. Director Lalmuanawma chuan Mizoram-ah sawrkar department 14 vel leh pawl, mimal engemaw zatin inhre tawn lova Skill Development an kalpui thu leh hmalak dan inhre pawh tlang veka thawhho a tul thute a sawi bawk a ni.

Mizoram chhunga Skill Development Programme hrang hrang Baseline Survey chu LESDE Department hian a nei a, Survey atanga an thil hmuh leh hriat-te a bu a siam chu he Committee hian an enho a. Member-te chu Skill Training kalpuina ah State in a mamawh dan azir a National Skills Qualifications Framework (NSQF) Aligned Courses thlan thiam theih nan NSQF nih phungte hrilhhriat an ni a, State Executive Committee pawimawhna leh mawhphurhna inhrilh hriatna hun neih a ni bawk. Hei bakah hian Mizoram Skill Mission Portal, LESDE Department leh Mizoram State e-Governance Society (MSeGS) hmalakna a buatsaih mek chu he Meeting-ah hian enho a ni a. He Portal hi Skill Development khawihtu department hrang hrang ten an training kalpuite data an dahthatna tur leh awlsam zawka khaikhawm leh vil theihna tur niin, Skill India Portal nen pawh a inthlunzawm tura duan a nih thu tarlan a ni.

Mizoram State Skill Development & Entrepreneurship Mission hnuaia State Executive Committee Member te hi Skill Development lama hmalatu sawrkar Department 14-a Director te bakah University aiawh, Industry neitute aiawh leh Training Provider-te aiawh pakhat theuh an ni.