Mizoram-ah Myanmar atanga raltlan 29,532 awmin raltlan te ID Card pek hna thawh mek a ni

India thenawm Myanmar ram-a buaina thleng avanga Mizoram-a raltlan rawn lut zingah Mizoram-ah mi 29,532 an awm mek nia chhinchhiah a ni a, Mizoram sawrkarin heng Myanmar raltlante puala Identity Card siam hna a thawh mek chu zawhfel thuai beisei a ni.

Mizoram sawrkar-a Home Department hotute sawi danin nikum February ni 1-a Sipai-in Myanmar sawrkar thuneihna an hnehchhuh hnua sipai sawrkar duhloh avanga nawrhna huaihawttute sipaiin tharum hmanga an beih takah khan mi sang tam tak chu Mizoram-ah an rawn tlanchhia a, nikum September ni 7 atanga tualchhung mi ralthuam kengte’n sipaite an beihlet tak hnu khan raltlan hi an pung chho ta zel a. Mizoram District 11-ah inzarpharhin sawrkar chuan raltlan lo lutte hi chhinchhiah a, Identity Card pek hna hi a thawk ta a ni. Hetia ID Card an neih hian harsatna an tawh pawhin tanpui a awlsam tawh dawn niin Home Department Oficial-te chuan an sawi a, tunah hian Official-a chhinchhiahnaah Myanmar raltlan Mizorama awm mek hi mi 29,532 an ni.

Raltlan tam zawk hi an puala sawrkar leh an awmna khawtlang leh tlawmngai pawl in an sak Relief Camp-ah an awm a, mahni chhungte leh thiante bel bakah In luah hawha awmte an ni hlawm a ni.

Tun dinhmunah Siaha District-ah raltlan tam berin mi 9,464 an awm mek a, Champhai District-in dawtin mi 7,810 an awm a, Lawngtlai chu raltlan tamna ber pathumna niin mi 5,475 an awm mek a ni. Heng bakah hian Lunglei District-ah 1,986; Aizawl District-ah 1,916; Hnahthial District-ah 1,732; Serchhip District-ah 433; Kolasib District-ah 149; Mamit District-ah 450; Khawzawl District-ah 64 leh Saitual District-ah 53 an awm bawk a ni.

Hriat theih chinah Hnahthial District-a raltlan awm zinga 1,110 chu ID Card pek an ni tawh a, Lawngtlai District-ah mi 4,794 chu ID card pek an ni tawh a, Aizawl District-ah pawh tunkar atang hian ID card hi pekchhuah hna thawh tan theih beisei a ni bawk.