Mizoram dinhmun ala thlamuanthlak loh tih sawi

Mizoram-ah nitin-a hri kai thar zat chu tunhnai kar hnih chhungin 15% - 20% inkarah a awm leh tak avangin kan dinhmun a thlamuanthlak loh thu Health Minister hova thutkhawm ah tarlan a ni.

Inrinni khan Health Minister Dr. R. Lalthangliana hovin SAD Conference Hall-ah Mizoram COVID-19 dinhmun thlirhona neih niin he hunah hian Mizoram-a nitin-a hri kai thar zat tunhnai kar hnih chhungin 15% - 20% inkarah a awm leh tak avangin kan dinhmun a thlamuanthlak loh thu tarlan a  ni a, inkaihhruaina thar a hma aia khauh deuh zawka duan chu kar khat vel kan hmang leh tawh a, a aia khauh lehzuala kal hi phurrit a nih thin avangin a pumpelh nan mitinin SOP kan zawm that a, COVID Appropriate Behaviour (CAB) kan zawm uluk a tul tih sawi a ni a. Mizo zingah Co-Morbid Condition (Zunthlum, Thisen sang etc) nei kan tam avangin kan fimkhur a ngai takzet tih pawh sawilan niin, Co-Morbid nih in hre lo, hri an kai hnu a inhrechhuak an tam thu leh mitinin mahni hriselna dinhmun kan chik a tul thu bakah, Co-Morbid te zawnchhuah hma a pawimawh hle tih te tarlan a ni.

He thutkhawm ah hian dawr hawn dan tur chungchangte, zan inkhawm chungchangte leh inkhawmna a him taka zaiho theih dan tur chungchanga rawtna te sawiho a ni a, ruihhlo ngai quarantine tulte buaipui dan tur leh Task Force siamthat dan tura rawtna te sawiho a ni bawk. Heng bakah hian mipuite hnenah uar lehzuala inzirtirna kalpui a tul thu tarlan a ni a, hmalak dan tur hrang hrangte sawiho niin Mask vuah uar tura Mizoram puma nasa lehzuala tan lak a tul thu sawi a ni a. CAB tha taka zawm a nih theih nan helam thlurbingtu Committee emaw, Team emaw din a that thu tarlana  ni bawk.

Hripui leng boruak enin District Hospital zawng zawngah ICU Khum dah a tul thu leh hemi atana hmalak ngaite sawi lan niin, naupangte pual bik PICU/NICU chungchang pawh sawiho a ni a. Temporary Hospital siam dan tur ngaihtuaha kawng hrang hrang dap mek a nih thu tarlan a ni bawk.

Mizoram sawrkar in Mobile RT-PCR Van a dawn Bhubanes-war-a an siam pawh rawn chhuak tawhin Mizoram rawn pan pui mek a nih thu Meeting-ah hian tarlan a ni a, Lunglei-a RT-PCR Laboratory pawh ICMR in a rawn approve tawh thu tarlan a ni.

COVID-19 hri kai nunna chan mi 383 te chu sawrkar laipui thuchhuak angin ralna sumfai Rs. 50,000/- theuh an chhungte hlan a nih tawh thu tarlan a ni a, midangte pawh pek chhuah leh turin buaipui mek a ni. Task Group on Insurance hnuaiah VLTF/LLTF COVID-19 hri dona kawnga fehchhuakte zinga nunna chan mi 2 ralna tur cheng nuai 20 ve ve chu sanction tawhin midang pakhat ralna buaipui mek a ni bawk.