Serchhip District-ah ASF vangin Vawk 123 a thi tawh

Serchhip District chhunga African Swine Fever (ASF) lenna hmunah Vawk thi an la awm belh zel a, nimin thleng khan ASF hri lenna hmuna Vawk thi hi 123 zet an tling tawh.

AH & Vety Department hotute hnen atanga thu kan dawn danin Serchhip District-a ASF hri lenna hmuna puan zingah New Serchhip leh East Lungdar-ah te Vawk thi an la awm belh zel a, Inrinni khan New Serchhip-ah Vawk thi 2 a awm belh thu report niin nimin khan New Serchhip-ah Vawk puitling 7 zet a thih belh leh bakah East Lungdar khua ah Vawk pahnih a thi leh bawk a, heng te nen hian Serchhip District chhunga ASF hri lenna khaw 6-a Vawk thi chhinchhiah chu 123 zet a tling tawh a ni.

Serchhip District chhunga ASF hri leng vanga Vawk thi tamna ber chu New Serchhip hi niin nimin thlengin Vawk 56 zet a thi tawh a, East Lungdar-ah hian Vawk 45 a thi tawh bawk a, khaw dang ah Vawk thi a awm belh rihlo thung.

Hetihlai hian nimin khan Serchhip-ah chhan hriatloh a Vawk thi 3 a awm belh leh bawk a, heng Vawk thi te hi Vawk puitling vek an ni a, Serchhip-a chhan hriatloh a Vawk thi pawh 16 zet a ni tawh bawk a ni. Heng Vawk thi te hi ASF hri kai nia rinhlelhna a lian sawt hle a ni.