ZPM MLA ten Covid dona CM Relief Fund pek tum tawhlo

ZPM Legislature Party-a tel MLA te chuan an MLA Fund leh an hlawh atanga Covid dona tura Chief Minister Relief Fund-a an pek thin chu pek chhunzawm an tum tawh lo.

ZPM Legislature Party Secretary, Dr. Vanlalthlana chuan, COVID dona atan an MLA Fund 1st installment atangin cheng nuai 25 chu CM Relief Fund-ah an lo pek tawh thu leh a bak cheng nuai 25 chu pek chhunzawm an tum tawh lo tih sawiin, “An ti tak tak lo kan ti deuh a, thil dangah pawisa an hmang reng tho a...” a ti a ni.

Dr. Vanlalthlana sawi danin, ZPM Legislature Party thukhawm thurel angin, an Fund leh an hlawh atangin Covid dona an pe tawh dawn lova, chu chu Assembly Secretariat lam pawh hriattirin, hlawh cut tawh lo tura tihna an thehlut a, chumi ang chuan an hlawh cut a ni tawh lova. Kum 2020-21 chhung atana an MLA Fund 2nd intallment an la dawn loh thu leh dawng pawh nise pek chhunzawm an tum tawh loh thu a sawi a. “Kan pek tello pawhin pawisa an hmang reng a, Restricted Tender pawh an inpe reng tho a, hna te pawh an thawk reng a, chuvangin kan pawisa hi an mamawhlo ange, kan ti ta a ni,” a ti.

MNF, ZPM leh BJP MLA mi 35-te chuan an hlawhpui atangin Covid-19 dona atana CM in 60%, Speaker, Minister, Deputy Speaker leh Deputy Chief Whip-te'n 50% leh MLA ten 30% theuh thawh an lo rel tawh a, kum 2020-21 Financial Year chhunga Fund cheng nuai 150 an neihah Rs. 50,00,000 theuh chu COVID-19 do nan thawh an lo rel tawh bawk.