Hri kai avanga enkawltu chungchanga harsatna tawk naupangte enkawl dan tur ruahmanna siam a ni

Nimin khan Health Minister, Dr. R. Lalthangliana hovin naupang COVID-19 hri kai lo, an nu leh chhungte COVID-19 hri an kai avanga In lama enkawltu neilo te sawrkarin a lo enkawl lailawk dan tur chungchang sawiho a ni.

He sawihona hun SAD Conference Hall-a neih ah hian COVID-19 Medical Operational Team Chairman, Dr. ZR Thiamsanga MLA, Health Department leh Social Welfare Department bakah Indian Medical Association aiawhte an tel a. He thutkhawm ah hian tun thla ni 4-a hemi chungchang ngaihtuaha thutkhawm neih-a a zirchiang tur Committee an dinin rawtna an siamte an thlirho a. Ruahman dan chuan Bal Bhavan, ITI Veng ami chu hetiang dinhmun a ding naupangte enkawlna hmun atan siam a ni a, District tinah a remchan dan anga ruahmanna siam tum a ni bawk. Heng hmuna naupang enkawlte hi Quarantine ngai an nih vangin Quarantine Facility inkaihhruaina anga enkawl an ni anga, reilote chhunga Child Care Institutions-a awm anga chhiar tur niin, naupang a bika enkawl leh venhim ngai an nih vangin Juvenile Justice (Care and Protection of Children) Act, 2015 leh The Mizoram Juvenile Justice (Care and Protection of Children) Rules, 2019 hnuaia naupang enkawl dan anga enkawl tur an ni.

Heng hmuna naupang awm thei turte chu COVID-19 hri kai lo, an chhungte hri kai vek, In lama enkawltu neilo emaw, naupang enkawltu ber COVID-19 hri kai vanga a awm loh hlana an chhungkua kha naupang tan a him tawklo nia ngaihte an ni ang a, an dinhmun hi Local Level Task Force leh Health Department Officialte bakah Social Welfare Department Official ten an enfiah ang. Enkawlna hmuna naupang awm te hi Guidelines milin Sample test sak thin an ni anga, an ei leh in tur chu Women and Child Development Directorate-in an ngaihtuah dawn a ni. Naupangte awmchilha enkawl turin Social Workers' Volunteer-te hman an ni ang a, naupangte hi uluk taka vilin Counselling pek thin an ni dawn a, nitin an awm dan tur programme tha taka ruahman a ni dawn bawk a ni.

Naupang kumtlinglo, rilru leh pianphunga rualbanlo mahni-a inenkawl theilo, COVID-19 hri kai lo leh symptom nei lo, nu leh pa emaw guardian (lo enkawltu bik neite) hri kai in an awmpui ngai si te chu BSUP, Durtlang CCC-ah dah tura ruahman a ni bawk. He thutkhawm ah hian nu COVID-19 hri kai in Children-Friendly Covid Care Centre-a naupang an hruailuh theih tur chin, Children-Friendly Covid Care Centre-a an luh hmaa an tih tur te, an luh hnu a an zawm tur te leh thil pawimawh dang chi hrang hrang sawiho a ni a. Reilote ah sawrkarin thupek chhuahin heng ruahmanna te hi kalpui a ni ang.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn