MPYCC in lawmthu an sawi

Mizoram Pradesh Youth Congress Committee (MPYCC) chuan RT-PCR Test man tihniam tura rawtna leh Private Hospital-a COVID-19 Test theih tur a ni ta chu lawmawm an tih thu an sawi.

Congress Thalai, Mizoram Pradesh Youth Congress Committee (MPYCC) hian nimin khan thuchhuah siamin tun thla ni 15 leh 17 khan thuthar thehdarhtute kawmin Sawrkar chu State dang anga Private Hospital leh Laboratories te COVID-19 test phalsak turin an ngen thu an sawi a. Mizoram Sawrkar chuan tun thla ni 18 khan Mizo-ram Gazette tichhuakin Private Hospital leh Laboratories te COVID-19 test a phalsak ta chu lawmawm an ti hle tih an tarlang a ni.

Hei bakah hian MPYCC chuan vawi tam tak Press Release leh Press Conference kal-tlanga Sawrkar an lo nawrna 'Mahni duh thu-a COVID-19 in test duhte RT-PCR testing man Rs. 4500/- chu a to lutuka ICMR duh angin mipui banphak Rs. 2500/- hnuailam tal ni rawh se' an lo tih chu Dr. Thiamsanga, MLA, Chairman-na Committee pawimawh tak 'COVID-19 Medical Operational Team'-in Sawrkarah an thlen dawn tak avanga an lawmthu an sawi bawk a. Rulling lai a ni emaw, Opposition lai pawh ni se, Congress Thalaite chu mipuite dikna leh chanvo hum-halhna hna an thawk reng dawn tih an sawi bawk.