Zampui tlangdung-a Tuikukte dah ngheh a nih lohna turin MZP in hmalak zel an tum

Mizo Zirlai Pawl (MZP) General Hqrs. chuan Tripura sawrkar-in Tripura ram chhunga Tuikukte inbenbelna hmun atan Mizote chenna, Zampui Tlangdung hman a tum chu an duhlo tih sawiin, Zampui tlangdung-a Tuikukte dah ngheh a nih lohna tur hian hma an la zel dawn tih an sawi.

Nimin a thuchhuah an siamah MZP General Hqrs. chuan Tripura-a Tuikuk-te an awm hlenna tura Central Sawrkar, Tripura sawrkar leh Mizoram sawrkar-in remna thuthlung an ziak chu lawmawm an tih thu tarlangin, “Tuikuk-te hi an duhthu ngeia Mizoram chhuahsan, dawta sual tinrenga min hek a, min puh zuitu, khawvel hmaa mualpho taka min puh hmingchhetute an ni,” tiin Union Home Ministry leh Mizoram sawrkar ngei pawhin vawi tam tak Mizoram-a an lo let leh theihna turin kawng a dap a, Mizoram-a hruai luh tumin hma a la thin nia sawiin, “Heti chung hian Mizoram-a awm duh lovin Tripura-a awmhmun khuar hi an duh zawk a, an duh ang ngeia an awm nghet tur hi kan lawmpui hle a. An duh ang ngeia Tripura-a inbengbel tur an nih laia hmasang atanga Mizote luah ram, Zampui tlang dunga Tuikuk khaw thar din tumna awm leh chhungkaw 6000 chuang dah tuma hmalakna awm mek hi MZP chuan pawi a ti hle a. Tripura sawrkarin a remtihna ngeia a ram chhunga Tuikuk te dah ngheh a tum hi MZP chuan tha a ti a. chutih laiin Mizote chenna hmunah Tuikuk te dah a tum hi Mizote chimraltumna leh hmuhsitna ah MZP chuan a ngai a. A tawp thlengin hma a la dawn a ni,” an ti.

MZP thuchhuah chuan tuna Tripura-a Tuikuk awmhlen turte hi Mizorama awm duh lo, Mizote nena chenho duhlo te an ni tih sawiin, “Mizote nena chenho duh tawh lo Tuikuk-te Zampui tlang-a Mizote nena chenho tir tuma hmalak a ni leh si hi MZP chuan a pawm thei lova. Mizote a chhe thei ang bera min chhuah a, kan pawi tam tak sawitu Tripura-a awm hlen tur Tuikuk te, Mizote ram, Zampui tlanga inbenbel tir hi kan duh lo tak zet a. Zampui Tlang dunga Tuikuk khaw thar din a nih chuan chi leh chi inkarah innghirnghona tawp thei lo a thlen kan hlau a. Chuvangin, Tripura sawrkar pawhin a thil tum hi sutin Zampui tlangah Tuikuk khua din lo turin thinlung takin kan ngen,” tiin chu chu hun lokal zel tur atana Tripura ram ralmuan zelna tur atana thil pawimawh tak pawh nia an hriat thu an sawi.

MZP chuan kum 1998 khan hmasang atanga Zofate luah ram, Mizo khaw 7- Sakhan Serhmun, Sakhan Tualsen, Upper Dosda, Satnala, Sakhan Tlangsang, Bancherra leh Lungthirek te chu Tuikuk-te hian an In leh lo chhuhsakin an lo umchhuak tawh nia sawiin, Zofate luahchin ram hi Tuikuk te avangin khap khat pawh chan leh MZP chuan an remti tawh lo tih an sawi bawk.

Comments

Chhiar Hlawhte