Latest News

MNF MLA 8 ten ZLP Leader, Lalduhoma disqualified tura ngenna Speaker hnenah an thlen

MNF Party atanga thlantlin MLA 8 te chuan Mizoram Legislative Assembly-a Zo Peoples Movement (ZPM) Legislature Party Leader, Lalduhoma chu dan kalh-a che ah puhin MLA atanga disqualified tura ngenna nimin tlai khan Mizoram Assembly Speaker, Lalrinliana Sailo hnenah an thlen.

Hemi chungchanga thuchhuah an siamah MNF General Hqrs. chuan Lalduhoma MLA hian Indian Constitution 10th Schedule Para 2 (2) a bawhchhiat avangin MLA a nihna atanga ban (disqualify) turin Mizoram Assembly Speaker hnenah ngenna an thlen tih an tarlang a. Assembly Speaker hnena lehkha an thehluh ah hian Independent-a thlantlin Lalduhoma hian a tak leh a thil tih zawng zawngin Party dang, ZPM a zawm ta nia tarlangin, Indian Constitution 10th Schedule Para 2 (2) a bawhchhe ngei nia tarlangin, ban ngei tur a nih thu an tarlang a ni.

Hetiang bawk hian kum 2006-a Independent a thlantlin Haryana MLA, Jagjit Singha chuan Congress Party a zawm thu leh Assembly Speaker in a lo ban tir (disqualify) tawh bawk nia tarlangin MNF MLA te chuan, chumi thu ah chuan Supreme Court chuan, ‘Mi in Party dang ah member atan inziaklut in Fee pe lo mahse, a taka a thil tih leh chet dan in chu party zawmna chu a takin a lantir ngei a nih chuan chu chu thu tling ah ngaih tur a ni,’ tiin chutiang taka Haryana Assembly Speaker in ro rel-a Jagjit Singha a ban tir-na chu a lo pawmpui thlap tawh tih an tarlang.

Hetiang chiah hian Lalduhoma pawh MLA atan Independent Ticket a thlanthin a nih thu leh chumi hnuah mipui vantlang hriat ah ZNP Party in ZPM Party thar chu zawmin an inchhung-lut vek tawh tih a puang nia sawiin, chung chu Media hrang hrangah pawh tarlan vek a nih thu an tarlang a. Hemi hnu hian ZPM Party Office-ah kalin ZPM Party function-ah mithar te ZPM-ah lawm-lutin thu a sawina hmun tam tak ami chu Media chi hrang hrangin an puang bawk niin an tarlang a. Hei vang hian Lalduhoma hian Indian Constitution 10th Schedule Para 2 (2) chu chiang takin a bawhchhia nia sawiin, MLA atanga ban tur turin Speaker hi an ngen a, Speaker hian engtin nge hma a lak zel dawn tih an thlir mek tih an tarlang bawk.

Nimin a Speaker hnena lehkha thehluttu MLA te hi Lalrinsanga Ralte, H. Lalbiakzaua, L. Thangmawia, H. Lalzirliana, Zothantluanga, C. Lalmuanpuia, Ramthanmawia leh Prof. F. Lal-nunmawia te nia thudawn a ni.

Comments

Popular News (Last 30 Days)