VC inthlang turin Serchhip-a Political Party hrang hrang an inbuatsaih mek

Village Council inthlanpui neih hun tur puan a nih hnuah Serchhip-a Political Party hrang hrangte chu inthlanpui neih tur atan an inbuatsaih mek a, naktuk-ah hi chuan Political Party hrang hrangte Candidate tur pawh a tlangpui chu hriat theih beisei a ni. Mizoram State Election Commission in tun thla ni 27-ah Village Council inthlanpui neih tura a puan hnuah Serchhip-a Political Party hrang hrangte chuan he inthlan hmachhawn tur hian hma an la mek a, tuna a lan danah chuan Serchhip Town chhunga VC 12-ah te hian party lian 3- MNF, Congress leh ZPM te chuan a hrang theuhin an chuh dawn nia langin kil thum atanga inbeihna a ni dawn in a lang a, Party lian pathum te hian thawhdun tuma inbiakna mumal nei lovin mahni theuhin chuh an tum niin a lang.

Rorellai MNF Party chuan Unit hrang hrang atanga Candidate awm te an thehkhawm hnuah tunah hian thuneitu sang ten heng rawtna hrang hrang lut te hi enfiahin a thlitfim hna an thawk mek a, tunkar Inrinni-ah emaw, karleh Thawhtanni-ah emaw an Candidate tur list hi tihchhuah an inbeisei thu an sawi a. Rorellai Party an nih angin beiseina sang tak an neih thu leh Town chhunga VC te lak vek tuma hma an lak thu an sawi bawk.

Hetihlai hian ZPM pawh he inthlanna hmachhawn tur hian an inbuatsaih mek a, VC area hrang hranga an Party Unit te chu hemi atan hian ruahmanna siam tura tiin tunah hian VC Area thenkhat ah chuan an Candidate tur hi an tifel tawh nia thudawn niin heng te hi Block pawmpui tura thehluh leh a ni a, tunkar chhung hi chuan an intihfel theih an beisei thu an Party hruaitute chuan an sawibawk a ni.

Eptu Party dang Congress Party pawh he inthlanna atan hian inbuatsaih mekin VC area tinah hma an la mek bawk a, Serchhip Town chhunga VC 12 awm-ah VC zawng zawng la tura an inbuatsaih mek thu sawiin, Candidate an tihfel hun tur erawh an la sawi theilo thung a, nimin tlai khan Party hruaitute chu VC thlan chungchangah hian an thukhawm nia thudawn a ni bawk.

Serchhip District BJP pawh nimin khan VC inthlanna neih tur hi thlirin State Vice President, JB. Rualchhinga hovin an thukhawm a, Serchhip District-ah VC hrang hrangah a tam thei ang ber chuh ve nise tiin amaherawh chu VC tam zawkah chuan Candidate an neih an rinloh thu an Party hruaitu thenkhat chuan an sawi bawk.