Chanchin thar thenkhat :

 Hri kai 3 enkawl dam an ni

Mizoram-a COVID-19 hri kai enkawl mi 3 te chu nimin khan Lunglei Pukpui-a SIRD CCC atanga chhuahtir an ni a, heti hian nimin thleng khan Mizoram-ah COVID-19 hri kai hmuhchhuah mi 953 awm tawhin mi 464 enkawl dam an ni ta a, hri kai enkawllai 489 an la awm mek bawk. Nimin thlenga Mizoram-a COVID-19 hri kai an hmuhchhuah tawh mi 953 zinga mi 375 (35.17%) te chu Force mi an ni a, midang 145 te chu Truck Driver leh Handyman te niin midang 433 te chu Civil mi leh Frontline Worker te an ni thung a, hri kai enkawllai 489 zinga 194 chu Civil mi leh Frontline Worker te an ni bawk.

COVID test man bithliah thar

Health and Family Welfare Department-in July 30-a thuchhuah siama COVID-19 test-na man lo bithliah tawh chu tih danglam leh a ni a. Hemi ang hian ICMR-in test tur a tih te, Frontline Workers COVID-19 test tura tih te,Contact Tracing Team in mi tupawh COVID-19 test tura an tih te leh CCC/DCHC/DGH-a COVID-19 hri kai enkawl mek te chu RT-PCR leh TrueNat test man te chu a thlawn a ni ang. Quarantine Centre-a awm te, August 1, 2020 leh a hnu lama State pawn atanga Mizoram-a rawn lut te leh Man chawi-a Quarantine Centre-a awm te chu RT-PCR Test man Rs. 2500/- leh TrueNat Test man Rs. 1500/- a ni anga, heng a tarlan tel loh, mahni duhthu a COVID-19 test duh leh COVID-Free Certificate dawn duh vanga test paltlang duhte tan tan RT-PCR ah Rs. 4500/- leh TrueNat-ah Rs. 3000/- a ni ang.

MZP in Online Exam tha ti lo

MZP General Hqrs. chuan nimin khan Executive Meeting neiin School Education Department hnuaia School thenkhatah online exam kalpui tumna a awm nia an hriat thu sawiin, mumal taka zirna kalpui anih hma leh zirtur chin ruahmanna siam anih hma a Online exam kalpui tumna awm chu tha an ti lo hle tih an sawi a. Hemi chungchang ah hian a tul anga hmalak chhunzawm an tum thu an sawi bawk. Hei bakah hian MZP chuan Mamit District chhung Pukzing ramchhunga Chakma te khaw din Mizoram sawrkarin Village Council hran a pe leh a pawmpui chu pawi an tih thu pawh sawiin, he khaw din hi an zirchiang dawn tih an sawi a. Kan ram leh hnam himna zel tur atan leh thang leh thar lo awm zel turte tan a kan ram neihchhun, Mizoram zimte chu hnamdang tan phalrai tawh lo tur leh pe tawh lo turin sawrkar an ngen thu an sawi bawk.

Lok Sabha MP in tlawh

Lok Sabha MP, C. Lalrosanga chuan nimin khan Model Village tura a thlan, Muallungthu khua chu a tlawh.a