Chanchin thar thenkhat :

 Harsatna tawh sawiho a ni

COVID-19 hrileng kara natna hrang hrang avanga phai atanga rawn haw damlo ten harsatna an tawh loh nan Zirtawpni khan Health & Family Welfare Board Vice Chairman, Dr. ZR. Thiamsanga hovin sawrkar mi pawimawh an thukhawm a, he hunah hian State pawna damlo inentir leh treatment la a rawn haw, inenkawl chhunzawm ngai, natna khirh tak vei te leh quarantine an nih laia damlo damdawi In-a awm ngai bawk si, an quarantine hun chhung la zo lo leh positive an nih leh nih loh pawh la hriat si loh te enkawl dan tur chungchang an ngaihtuah hnuah damdawi In danga dah lovin Zoram Medical College (ZMC)-ah enkawl zel ni tawh se an ti a. Hetiang damlo te hi ZMC-ah Quarantine period ni 14 an awm chhungin COVID-19 test tih sak an ni anga. An quarantine period a zawh hnuah COVID-19 Negative apiangte chu an duhna emaw, an awm theihna Hospital dangah sawn chhuah theih nise tiin an rel bawk.

Khaw 15-ah tlingah puang

August 27, 2020-a Village Council inthlan lo awm turah khaw 15-ah chuhtu awm lova thlan-tlin an awm tawh a, hengte hi MNF khaw 12 leh Congress khaw 3-ah an ni. Chuh lova MNF VC tlinna hi Lunglei District-ah Kawlhawk (Reserved seat) leh Sethlun te an ni a, Thehlep-ah Congress chu chuhtu awm lova thlantlin an ni. Champhai District-a Ruantlang Mual Veng leh Vangchhia (Reserved Seat)-ah MNF Candidate chuhtu awm lova tlingin New Hruaikawn ah Congress an tling bawk. Mamit District-a Bekabery (Lianbuang), Chhippui-II, Hruiduk, Phuldungsei Zampui leh Serhmun West-ah te MNF chu chuhtu awm lovin tlinga puan an ni. 

Saitual District-a Lenchim khuaah MNF, Khawzawl District-a Tualte (Reserved seat)-ah Congress te chu chuhtu awm lova tlinga puan an nih bakah Hnahthial District-a VC pahnih Hniahthial-III leh New Kawnpui-ah te chuan MNF chuhtu awm lovin an tling bawk a ni.

Total Lockdown titawp rih

Aizawl Municipal Corporation (AMC) huam-chhunga Total Lockdown kalpui mek chu tukin dar 4:30 hian a tawp dawn ta a, hemi chungchang ngaihtuaha nimin-a Health Minister, Dr. R. Lal-thangliana hova sawrkar mi pawimawh te thukhawm chuan Total Lockdown hi kalpui zui tawhlo turin an rel a, amaherawhchu mipui mimir chhuak huk tur khuahkhirhna atan ruahmanna erawh siam a ni dawn thung a ni. He hunah hian hri leng dona kawnga hmalakna hrang hrang thlirho a ni bawk.

YMA in ngaihdam dil phut

Nimin-a Central YMA Executive Committee thukhawm chuan August 15, 2020-a Sesih khuaa Assam Rifles ten Sesih khaw hmei-chhe feh haw te lakah hmeichhe zahawmna ti bawrhbang zawnga an che leh Mizoram sawrkar in COVID-19 leng mek laka himna tura Vai-rengte-a endikna hmun a siam pawisa lova an paltlang chu an dem thu an sawi a. Hetiang thil avang hian August thla ralhma ngeia Mizo mipuite chunga ngaihdam dil turin an phut bawk.

Mipuite fimkhur turin chah

MNF Thalaite chuan inthlanpui neih tura Vote nei te chu hripui pudarhtu emaw, kai chhawngtu emaw ni lo tura theihtawpa fimkhur turin an chah. Inrinni-a thuchhuah an siamah MNF Thalaite chuan kan hma lawkah Local Council leh Village Council inthlan a lo awm leh dawn ta tih tarlangin, Zoram-in hripui avanga hun harsa tak kan tawh mek lai a nih thu leh khawtlang-a rorelna tha leh fel tak a awm vat theih chu mipui tana a that zawk avangin, hun rei tak inthlan lo sawn hlat tawh chu eptu lam ten sawn hlat leh phut mah se, sawn hlat leh chi ni tawh lova a lan thu an sawi a. Hei vang hian vote nei zawng zawngte chu hripui pudarhtu emaw, kai chhawngtu emaw ni lo tura theihtawpa fimkhur tura an duh thu sawiin, “Mitinte him nan sawrkarin theihtawp chhuah ve bawk mah se, mahni himna hi mahni kutah a innghat lian ber a ni tih i hre thar ang u,” an ti bawk.