Chanchin thar thenkhat :

COVID-19 kai hmuh belh leh

Nizan hmasa khan Mizoram-ah COVID-19 kai mi 3 hmuhchhuah belh leh niin heti hian tun dinhmun ah Mizoram-ah COVID-19 kai enkawllai mi 16 an awm mek a ni. Tunhnaia Mizo-ram-a rawn haw te COVID-19 kai leh kai loh enfiah hna thawh chhunzawm zelah nizan hmasa khan ZMC Laboratory-ah COVID-19 kai mi 3 hmuhchhuah leh niin heng mite hi Lunglei, Mamit leh Saitual District mi te niin heng te hi hmeichhia theuh an ni a, kum 19, 22 leh 45 te niin an vai hian tunhnaia Mizoram-a lo haw te vek an ni.

Chief Minister in sawipui
COVID-19 hrileng kara kuthnatawktute harsatna sukiang tur leh buh leh thlai-a ram a intodelhna tura hmalakna te chu nimin khan Chief Minister, Zoramthanga chuan Agriculture Department Minister, C. Lalrinsanga leh Department officer te leh Horticulture Department officer te chu a hran ve ve in a Pisa-ah a sawipui a. Chief Minister ho hian intodelh tura department ten ruahmanna an lo siam tawh te thlirlet in, Project tangkhang hrang hrang chungchang leh sum dinhmun te sawiho a ni bawk.

Job Portal thlirhona nei
Mizoram Youth Commission-in Job Portal a siam mek chu nimin khan ICT Minister, Robert Romawia Royte hovin MINECO Conference Hall-ah thlirho a ni. He hunah hian ICT Minister chuan Mizoram mamawh tak hnathawktu, mamawhtute leh hna zawngtute hman tangkai tur Job Portal siam mek chu lawmawm a tih thu sawiin, Mizoram-ah lehkha thiamlo hnathawh tur hmu si lo te tan ruahmanna siam a pawimawh thu a sawi a. He portal pawimawh tak siam tura Mizo Firm ngei rawih a ni chu lawmawm a tih thu a sawi bawk. Portal siam mek thlirhona ah hian Portal siamtu ten Power point presentation hmangin Portal nihphungte an entir a, sawihona te neiin kalkhawmte hian rawtna an siam te pawh sawiho a ni bawk.

MNF in K. Vanlalven ruat
Tun thla ni 19-a Mizoram Rajya Sabha MP thlanna neih tur chungchang ngaihtuahin nimin khan MNF Nomination Committee chu an President, Zoramthanga hovin an thukhawm a, an Party Nominate atan tuna Aizawl Bawngkawn-a cheng mek, K. Vanlalvena, NCC leh Party Thalai President hlui chu an ruat. MP (RS) hi MLA te thlan tur a nih avangin tling ngei tura ngaih sa a ni.

Mi 1338 ten Mizoram thleng
Maharashtra atanga Mizoram mi leh sa tangkhang lo haw, Rel kawng chhia avanga Bus hmanga rawn phurh te chuan Bus 60 hmangin Mizoram an rawn thleng fel ta a, nimin khan Bus 78 hmangin anmahni District theuh ah phurh nghal an ni. Tun tuma rawn haw te hi mi 1338 niin Serchhip District atangin mi 62 an tel a, nimin tlai khan Serchhip rawn thlenpui an ni.

Mamit-ah hmalak dan tur rel
Nimin khan Mamit-ah District Level Task Force on COVID-19 chu thukhawmin an District-ah COVID-19 Positive hmuhchhuah a nih tak avanga hmalak dan tur an sawiho. Nimin a Meeting hi District Bawrhsap, Dr. Lalrozama chuan kaihruaiin rampawn atanga an District-a rawn haw zingah COVID-19 kai hmuhchhuah an awm tak avangin Mamit District chhunga Quarantine Center zawng zawng leh a compound area-te chu tumah kal phalloh bur nise an ti a. Engemaw vanga tul bik thil a awm anih chuan DC leh VLTF phalna la hmasain, Quarantine Facility-a Security Duty-te kaltlangin khunghrante hi loh theih lova an mamawh zual pek theih a ni ang.
Hei bakah hian Mamit District chhungah COVID-19 vei hmuhchhuah an awm tak avangin loh theih lohah chauh lo chuan pawn chhuak lo tur leh pawn chhuakte pawhin Mask vuah ngei ngei nise a ti a. Social Distancing nasa lehzuala ngaipawimawh turin District chhung mipuite a ngen a. Mask vuah lova pawn chhuak leh Social Distancing ngaipawimawh lo-te chu Police Flying Squad Duty mai bakah Veng tina VLTF Duty ten khauh lehzuala hmalain pawisa an chawitir zel dawn a ni.

COVID-19 kai enkawl nghal
Lunglei DC leh District Task Force on CO-VID-19 Chairman ni bawk, V.Lalsangliana, IAS chuan nimin khan thuthar thehdarhtute kawmin Lunglei District in COVID-19 Positive Case an neih hmasak ber chu nizan hmasa khan hmuh-chhuah a nih thu a sawi a. COVID-19 vei hi Delhi atanga lo haw, June 1-a Lunglei lo thleng anih thu sawiin, tun dinhmunah khawsik nei lovin hritlang leh khuh (mild case) a neih thu leh dinhmun hlauhtawhnawm a ni lo tih a sawi a. Tunah hian Covid Care Centre, Pukpui-ah dah hran nghal a nih thu leh Mecial Team Doctor leh Nurse ten 24 hours in an vil reng dawn tih a sawi bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn