Larsap hovin Aizawl-ah Republic Day hman a ni

India Republic Day vawi 71-na chu nimin khan rampumah hman niin Mizoram-ah he Ni lawmna pui ber chu Aizawl Sipai Lammual-ah Governor, P.S. Sreedharan Pillai hova hman a ni.

Aizawl-a Republic Day lawmna ah hian Governor chuan Hnam Puanzar pawt pharhin zahna chibai a buk a. Parade contingent-te a endik hnuah Parade Contingent te Hnam puanzar chibai bûk a chhánglêt a mipuite hnenah thuchah sawi zuiin sawrkar hmalakna hrang hrangte a tarlang a ni. He hunah hian Governor chuan India Danpui siam a nih a, kum 1950 January 26-a Kumpinu Sawrkar siam Danpui, Government of India Act (1935) a rawn thlak tak Ni hriatrengna leh lawmna ni atan Republic Day hi hman \hin a ni tih sawiin, he Ni pawimawh tak hi India in ama puala Danpui a hman \anna ni a nih bakah ram pakhat, mahni a thuneihna neia inrelbawl hrang (Independent Republic), khua leh tui ten rorel tura an aiawh an thlanna ram a nih \anna ni a nih thu a sawi bawk.

Governor chuan Zalenna, remna leh muanna hnuaiah hmasawnna a awm \hin tih sawiin, Hun reilote chhung, kum khat emaw lekah Mizoram Sawrkar chuan hmasawnna ruhrel pawimawh tak tak din hman tawhin hmasawnna kawngah thui tak ke a pen tawh tih a sawi a, “Chief Minister viak \ha tak, hruaitu nih tlin kan nei a. Ani hian State hmasawnna tur leh ham\hatna turin theihtawp a chhuah mek a. Central Sawrkar hotute nen pawh an in hre \ha hle a, kan vannei hle a ni,” a ti.

Tun kum khat liamta chhung khan hlawhtlinna tam tak zingah a langsar zual pathum, chhuanawm tak tak a awm tih larsap chuan sawiin, Central Sawrkar, Mizoram Sawrkar, Tripura leh Bru-Reang ten kum 22 chhungzet sum, tha leh hun sengso-a kan buaipui Bru-Reang harsatna chu inremna thuthlung ziakin chinfel a ni ta tih sawiin, a lawm awm tak zet a ni, a ti a. Sawrkar in HPC (D) te Peace Accord a lo siampuina rah leh Remna leh Muanna kawngah ka sawrkarin a \ul ang apiang te a tih zel avangin Sinlung Hills Council pawh boruak muanawm tak hnuaiah hlawhtling taka neih a nih thu leh hei hian helai bial-ah pawh hmasawnna kawnga ke pen a tichak sawt dawn tih a sawi a. Hei bakah hian Mizoram History a lian ber, Mizoram State Games hlawhtling taka huaihawt a nih thu sawiin, “He hunah hian Mizo \halai infiammi hmalam hun eng tak takte tan an theihna te pholanna hun siamsak a ni a. Hei hian Infiamna Khawvel-ah hma kan sawnchhoh zel na turin sawrkar chuan a tih theih apiang te tihzel a tum tih a chiang hle,” a ti a. “Ka sawrkar chuan Khelmual, infiamna hmunhma leh infiamna hmanraw \ha zawk te pawh chhawp-chhuak zel dawn a. Heng hlawhtlinnate hi Zoram mipuite tan thil lawmawm tak leh inchhuanna tham a ni,” a ti bawk.