Mizoram Governor 19-na atan Prof. Jagdish Mukhi chu rinawmna thu tiam tirin lakluh a ni

Mizoram Governor 19-na ni turin Inrinni khan Prof. Jagdish Mukhi chu Justice Nelson Sailo, Judge Gauhati High Court chuan rinawmna thu tiam tirin a lalut.

Mizoram Larsap hna chelhtu, Kummanam Rajasekharan chuan a mawhphurhna a bansan tak avangin a aiawh tura ruat, Assam State Governor nilai, Prof. Jagdish Mukhi chu Inrinni chawhma dar 11:00 khan Raj Bhavan Durbar Hall-ah Prof. Jagdish Mukhi hi Justice Nelson Sailo, Judge Gauhati High Court chuan rinawmna thu tiam tirin a lalut a. Governor thar lakluhna inkhawm hi chawhma dar 11:00 ah \anin Mizoram Chief Secretary, Lalnunmawia Chuaungo chuan programme a kaihruai a, Chief Secretary hian Mizoram Governor hna lo chelh lailawk/hmui tura President in Assam Governor ruat a nihna chu a chhiarchhuak a, hemi hnu hian rinawmna thu tiam tira lakluh a ni ta a ni.

Swearing in Ceremony neih zawhah Chanchinbumite nen inkawmna hun Banquet Hall-ah neih a ni a. He hunah hian Governor thar hi Chief Minister, Zoramthanga chuan a \awiawm a. Chanchinbumite zawhna te chhangin Larsap thar chuan Mizoram sawrkar mumal taka a kal reng theihna turin a tih turte rinawm takin a ti dawn tih a sawi a. Mizoram Governor hna lo hmui tura ruat a ni chu lawmawm a tih thu sawiin, Mizoram hmun kilkhawr zawkte tlawh a tum leh tum loh zawhna chhangin hun a nei tlem avangin a ngaihtuahnaah a awm hrih lo tih a sawi a, Assam leh Mizoram ramri buai chu state pahnih te ngaihtuah tur a ni a, Governor thuneihna a ni lo niin a sawi bawk.

Prof. Jagdish Mukhi hi Dec. 1, 1942 khan Dajal, Dera Ghazi Khan, tunhnua Punjab Province, Pakistan-ah a lo piang a. India leh Pakistan \hen hran hunlai khan Sohna, Gurgaon District, Haryana State-ah an pem a ni. Thiamna lamah B.Com, M.Com leh Ph.D (Finance) a ni a. Indian Police Service (IPS) a bansan hnuin Shaheed Bhagat Singh College, Delhi University-ah Professor hna te rei tak a thawh hnuin Politics lamah a zuang lut a.Delhi sawrkarah Minister of Finance, Planning, Excise and Taxation leh Higher Education hnate a chelh tawh bakah Andaman and Nicobar Islands-ah Lt.Governor hna a chelh tawh bawk.