Irrigation & Water Resources Minister in Mizoram State Water Policy-2019 a tlangzarh

Irrigation & Water Resources changtu Minister, C.Lalrinsanga chuan nimin khan Chief Engineer Committee Room, Irrigation & Water Resources Department Office, Aizawl-ah 'Mizoram State Water Policy-2019' chu a tlangzarh.
Mizoram State Water Policy-2019 tlangzarhna hunah hian Irrigation & Water Resources changtu Minister chuan Mizoram State-in Water Policy a vawikhatna atana a nei ta chu ram tana chhinchhiahtlak, thil pawimawh a tling a ni, a ti a. He policy hian tui hlutna leh vawnhim a \ul zia a tilang a, tu leh fate tana tui kan khawl loh chuan nakinah la kiam mai thei leh harsatna tawk thei kan nih dan min hriattir a ni, a ti bawk. Khawvel hmun \henkhatah leh India ram chhung ngeiah pawh tui mamawhna a sang tih sawiin Minister chuan, Tui inchuhna leh tui avanga harsatna a thleng \hin tih a sawi a. Tlangram Lo neih avangin leiin tui a hip theihna a tlahniam a, lei hnuaia Tui lut a tlem chuan lui leh kawr tui a tlem lo thei lo tih sawiin, Mizoram-ah tun dinhmunah harsatna lian tham la thleng rihlo mahse Water Policy neih chu thil \ul tak a ni tawh tih a sawi a. Tun a\angin Tui renchem kawngah inzirtir nasat a \ul a, lo neih dan kalphung kan thlak loh chuan kan hmabak a eng vak lo a ni, a ti bawk.
Mizoram State Water Policy-2019 siam tur hian India-German Cooperation hnuaiah GIZ (German company) mithiamte kaihhruainain IORA Ecological Solutions Pvt. Ltd., Delhi ten an siam a. He policy duang tur hian State sawrkar pawhin Chief Secretary kaihhruaina hnuaiah Task Force a din a, he Task Force kaltlang hian Mizoram State Department hrang hrang - I&WRD, Public Health Engineering, Forests, Power and Electricity, Soil, Agriculture, Horticulture leh Fisheries Deparment-te nen inrawnkhawmna duan a ni.
National Water Policy hi kum 2008 ah duan niin kum 2012 ah ennawn a ni a. Chumi zul zui chuan state tinte hi Water Policy nei \heuh tura sawrkar laipuiin a beisei angin Mizoram Water Policy hi buatsaih a ni a. Mizoram-a tui kan neih ang ang - ruahtui, lui tui, lei hnuai tui (ground water) leh tui hna dang te \angkai leh mumal zawka hman a nih theihna tur leh rualkhai zawka tui mamawhte kan hmuh theih nan he Policy hi duan a ni.
Mizoram State Water Policy 2019 tlangzarhna hun hi I&WRD Secretary, Thlamuana’n a kaihhruai a. GIZ Regional Coordinatior, Dr.Kenneth M.Pala leh IORA Ecological Solutions Vice President Dr.Sumana Bhattacharya ten Mizoram State Water Policy - 2019 chungchang sawi zauna hun an hmang bawk.

Comments

Popular posts from this blog

PAN CARD an tih teh fo hi - Laldinpuia