Pre-World Cup Mizoram Open Para-Gliding Accuracy Landing Championship Serchhip-ah neih mek a ni


Khawvel huap infiamna lama inelna Mizoramin a thlen hmasak ber tur nia hriat, Pre-World Cup Mizoram Open Para-Gliding Accuracy Landing Championship chu nimin khan Serchhip Chuanhnuai-ah neih \an a ni a. Nizan hmasa khan he Championship hawnna hi Serchhip Auditorium-ah neih a ni.

Serchhip Auditorium-a he Pre-World Cup Mizoram Open Para-Gliding Accuracy Landing Championship hawnna nizan hmasa a neih hi Mizoram sawrkar-a Planning Secretary, C. Vanlalramsanga chuan khuallian nia hmanpuiin Para-Gliding chu infiamna thianghlim leh diklo tak thil tih awmlohna nia ahriat thu sawiin, ram hrang hrang a\anga he intihsiakna a tel tura kal te chu in\hian\hatna atan he hun hi hman \angkai tum turin a chah a. Mizoram Aero-Sports Association ten hetianga mipuite tana ennawm in bawk tur an chhawpchhuak chu lawmawm a tih thu sawiin, Mizoram in infrastructure \ha a neilo chunga hetianga infiamna lama intihsiakna liantham kan thleng thei chu lawmawm a tih thu a sawi a. Mizo \halaite zinga khawvel huapa infiamna lama hming lang an awm tak fo thu pawh sawiin, tun \umah pawh Mizo \halai 6 lai an tel chu lawmawm a tih thu a sawi a. Taima leh rinawm taka ti \hin te tan hlawhtlinna a awm \hin thu sawiin, Serchhip khua in he inelna hneh taka a thlen chu lawmawm a tih thu a sawi bawk.
He hunah hian Mizoram Aero-Sports Association President, J. Vanlalliana chuan inlawmna thu sawiin tun \uma intihsiakna ang hi India ramin a thlen vawihnihna leh India hmarchhak-ah \um khat nghahna a nih thu a sawi a, he inelna a tel tur hian India ram chhung bakah Korea, Japan, Columbia, Luxemberg leh Slovenia bakah ramdang a\angin Pilot an rawn kal thu a sawi bawk
He intihsiakna hi nizan hmasa-a a hawnna neih a nih hnuah nimin khan Serchhip leh Kei\um inkara Chuanhnuai a\angin intih-siakna hi neih chhunzawm nghal a ni a, Para-Gliding a Pilot te chu Chuanhnuai a\anga thlawk-chhuakin Zawlpui phai-a a \umna tur hmun buat-saih ah an in\um siak a, he intihsiakna ah hian India ram bakah khawvel ram dang 6 a\angin Pilot 42 telin mi pakhat hi \um 6 zel an thlawk thei a ni. He inelna hi Serchhip mipuite pawhin an hlutin a hmuna entu pawh \hahnem tak an awm a, zirna In \henkhata zirlaite chu an zirtirtu ten hruaiin an chhim pui bawk a, Vawiin ah pawh a hmun ngaiah chhunzawm leh a ni ang.
Mizoram Aero-Sports Association (MA-SA) Sub-Hqrs. Serchhip hruaitute chuan helai (Chuanhnuai)-a Para-Gliding an tihna hmun chu India ramah pawh a \ha ber pawl a nih thu leh thli kaldan pawh a \hat thu an sawi a. Tun \uma he intihsiakna endik tura rawn kal ten Federation Aeronotique Internationale (FAI)-a report an thehluh dan a zirin World Cup hial pawh thlen theih a beiseiawm tih an sawi a. Serchhip mipui ten an hlut avanga lawmawm an tih thu an sawi bawk.

Comments

Popular posts from this blog

PAN CARD an tih teh fo hi - Laldinpuia