Myanmar atanga Mizoram-a Rohingya raltlan rawn luh palh theih chungchang sawihona neih a ni

Myanmar-a Rohingya helpawl leh Myanmar Sorkar Sipai te Myanmar hmar lam Rakhine State-a an intihbuai vanga Rohingya hnam te India ram-a an lo luh chungchang ah nimin khan High Level Security Meeting chu Aizawl Khatla-a 23 Sector Assam Rifle-ah neih a ni.

Nimin a High Level Security Meeting hi Major General Upendra Dwivedi, Inspector General Assam Rifles (East) chuan kaihruaiin, tunhnaia Rohingya te India rama an lo luh chungchang leh Rohingya helpawl leh Myanmar sipai te Myanmar hmarlam Rakhine State-a an in tihbuai chungchang ah Mizoram invenhimna kawngah in ennawn thar a \ul thu a tarlang a. Assam Rilfe Inspector General chuan Indo-Myanmar venhimna chungchang thu ah hian ramri hnaiha awmte tan Rohingya helpawl leh dan lova lut te hi ram mipui te tan a himlo thei tih a sawi bawk.

Inspector General hova \hutkhawm ah hian ramchhunga venhimna hna thawktu BSF, CRPF, State Police leh Intelligence Agency dangte chu an aiawh \heuh an tel a. Meeting-ah hian 8th Assam Rifles Company te chu Indo-Myanmar Border-ah venhimna chak zawk dahbelh tura tih an ni a, IG chuan Intelligence Agency zawng zawng, State Police leh CRPF te chu ramri ah khuah lehzuala venhimna thawk turin a hriattir bawk a. A bik takin Mizoram khaw kilkhawr deuh ah te leh ramri hrul, tlawhpawh zen zenloh ah te Rohingya hel leh dan lova luh tum te dang tura venhimna hna thawk turin a hriattir bawk.

He hunah hian 23 Sector Assam Rifle DIG, Brigadier MS. Mokha chuan India leh Myanmar ramri-a venhimna an kalpui dan leh hnathawh dan tur kalphung te sawifiahin, Rohingya hnam te India-a an rawn luhruk tam em avang hian Helicopter leh mihring khalh loh chi thlawhna hmangte in ramri hi uluk taka ven a nih thu a sawi a. Inhmuhkhawmnaa telte hian tunah tak hi chuan Mizoram-ah Rohingya hi an la rawn lutru lo nia hriat a nih thu an sawi bawk.

Hetihlai hian India chuan Bangladesh-a Rohingya raltlante \anpui nan ‘Operation Insaniyat’ chu nimin khan a \an a, tunlai hian Myanmar a\anga raltlan, Rohingya mite chu nasa taka nghaisak an ni a, riahna leh silh leh fen neilo tam tak awmin, hemi chungchang leh an harsatna a \anpui turin India chuan hma a la a. External Affairs Ministry chuan heng raltlante hnenah hian Buhfai, Betemu, Chini, Chi, Tel, Chhang leh Thosilen te a theih ang anga sem tura hmalak a ni a, heng chhawmdawlna te hi a thawh khatnan Indian Air Force chuan nimin khan Chittagong an thlenpui a. External Ministry thuchhuah chuan Bangladesh in buaina an tawh chuan India \henawm an nih avangin kan pui tur a ni tih a tarlang bawk a ni.