District Hospital Serchhip-ah khum 15 awmna tur Makeshift Building sak thar hawn a ni
District Hospital Serchhip sak that a nih avanga khum indaihlohna nasa tak a awm avanga mipuite harsatna sutkian a nih theihna tura Serchhip Joint VC te hmalakna a khum 15 awm theihna tur ‘Makeshift Building’ thar hi Lok Sabha MP, Richard Vanlalhmangaiha chuan hawngin hemi puala inkhawm Serchhip CMO Conference Hall-a neih ah Lok Sabha MP chuan MP Fund pekchhuah kawngah ram tana ro tling thilte a ngaih pawimawh thu sawiin, Makeshift Bulding sak nana hmalakna chu thil ngaihhlutawm tak a nih thu a sawi a. Kalphung thar Sawrkarin Department hrang hrangah theihtawp chhuahin tan an lak thu sawiin, “Health Deparment chu Deparment thang nasa pawl tak an ni,” a ti a. Mizoram in Health Minister tha tak kan nei chu lawmawm a tih thu sawiin, MUHCS pawhin rampawn thlenga ngaihhlut a hlawh thu leh Serchhip District-ah pawh beneficiary 715 vel an awm tawh thu a sawi bawk. Lok Sabha MP chuan Serchhip District chu District hmasawn leh danglam bik nia a hriat thu pawh sawiin, DISHA Meeting-a District hrang hrang a tlawh kualnaah pawh Serchhip District chu District tam takin Central Scheme kalpuina kawngah an pha lo niin a sawi a. Kum 1978-a MLA hmeichhia thlang tling thei District, hmeichhe dinhmun chawisanna kawnga hmahruaitu an nih thu pawh sawiin, hmasawn zel turin duhsakna a hlan bawk a ni.
He hunah hian Khual zahawm leh Bawrhsap Paul L. Khuma pawhin Damdawi In khum indaihlohna chuan mipuite nunah leh ni tin khawsakna kawngah nasa takin nghawng a neih thu a sawi a. Sawrkar hruaitu Chief Minister leh Lok Sabha MP ten Serchhip mipuite harsatna hrethiama, Makeshift Bulding sak hlawhtlin a nih theih nana an hmalakna ah lawmthu sawiin, Serchhip Joint VC-ten Fund awmsa ni miah lo ata awma siama mipui tana an pen chhuahna chu fakawm a tih thu a sawi bawk a. Health Department-a thawkte hnenah pawh lawmthu sawiin, mipuite'n an chhawr nghal theih tura hma la zui (activate) nghal turin a ngen nghal bawk a. Kalkhawmte chu midangte tana malsawmna ni tura fuihin, peih chin baka ke pen luih hram hramna hian hmasawnna nasa zawk a thlen thin tih hre renga, theihtawp chhuah zel turin a chah bawk a ni.
District Hospital Serchhip-a Makeshift Building thar hawnna inkhawm hi Serchhip Joint VC Chairman R. Sanghmingthanga chuan kaihruaiin Joint VC Secretary Lalrinmawia Khiangte chuan Report a pe a, he Building hi a dung ft. 33 leh a vang ft. 28-a zau-a sak niin Mizopa chhiara chhawng hnih (2) a ni a, damlo khum dahna tur bakah 1st Floor-ah inthiarna panga (5) dah niin 2nd Floor-ah hian pali dah a ni bawk a. He Building sakna atan hian Chief Minister leh Bialtu MLA Lalduhoma hmalakna kaltlangin NEDFi te CSR Fund atangin cheng nuai 17.3 leh MP (Lok Sabha) Fund atangin cheng nuai 20 hmuh a ni a; he building sak hna hi Serchhip Joint VC te hian thawkin sum hman bang awm ang angte chu CM Relief Fund-ah an chhunluh leh vek tur thu an sawi bawk a ni.
He Building hi Serchhip CMO Office Building hnunglam-ah sak niin nikum November 17 khan a sak hna hi thawh tan a ni a, kumin May 12 khan sak zawh niin he Building thar hawnna hunah hian Serchhip District Medical Superintendent, Dr. ZD. Lalmuanawma pawhin thu a sawi bawk a, he hunah hian Serchhip-a VC Member te leh khawtlang hruaitu engemaw zat bakah Health Department-a thawktute an tel a ni.