Serchhip-ah PM Surya Ghar zirhona neih a ni; Serchhip District-ah hmang tangkaitu an la tlem

Rampum-a ‘Solar Month’ hman mek denchhenin nimin khan Serchhip-ah PM Surya Ghar: Muft Bijli Yojana (Rooftop Solar Installation) chungchang inzirtirna hun hman a ni a. Serchhip District-ah he hmalakna hnuaia hamthatna dawng hi mi 16 vel chauh an la awm thu he hunah hian tarlan a ni.
Serchhip DC Pisapui Hall-a he hun hman ah hian P&E Department Serchhip Power Division-a Executive Engineer, Er. Lalramnghaka chuan inlawmna thu sawiin, he hmalakna in a tum tlangpui te a sawifiah a. India sawrkar laipui chuan Rooftop Solar Scheme hi Phase-I leh Phase-II kalpui tawhin Mizoram-ah chuan he hmalakna hnuaiah hian chenna In 431-ah 1.9MWp bun a nih tawh thu leh PM Surya Ghar: Muft Bijli Yojana hi February 29, 2024-ah tlangzarh a nih thu a sawi a. He hmalakna ah hian Mimal chenna Inchung-a Rooftop Solar (RTS) Plant hmanga power siam chu Grid Power Supply Line nen thlunzawm leh RTS atanga power siamchhuah chu a neitute’n an mamawh dan angin a man hranpa awm lovin hman nghal theih bakah an hman sen loh Power siamchhuah (generate) a nih chuan Grid (Electric Supply System network)-ah thawnchhuah theih a nih thu a sawi a. Ruahmanna dang a awm a nih loh chuan he scheme tihhlawhtlin theih hun chhung hi 31st March, 2027 thleng emaw, National Portal-a installation tih zawh tawh in vbc. 1 a tlin thleng emaw-a a hmasa zawk zawk a nih thu a sawi a ni.

Serchhip Power Division-a Executive Engineer chuan he Scheme in a huam chin tarlangin, India ram chhunga cheng, Electric consumer ni mek leh Electric Bill pe thin (valid electricity consumers) te a huam thu leh RTS install-na hi chenna In (residential) ngei a ni tur tih sawiin, In dang-ah erawh a remchan loh thu bakah RTS install-na hi Elevated Structure (roof/terrace/ balcony) emaw a nih tur thu a sawi a. RTS dil duhte tan hian Online hmanga dil tur a nih thu te; State portal (pmsuryaghar.mizoram.gov.in)-a registration leh application tih hnuah National Portal (pmsuryaghar.gov.in)-ah registration leh application tih leh tur a nih thu te; Dilna ah diltu hming, electric connection neitu hming leh Bank A/c Holder hming a inang vek tur a nih thu te; Rooftop Solar installation ti thei (Empanelled Vendors) zinga duh ber thlan tur a nih thu leh Empanelled Vendors ruai lova Rooftop Solar install tan subsidy a hmuh theih loh thu te a sawi a. Nationalised bank hrang hrangten he scheme atan hian loan an pek theih thu pawh a sawi bawk.

Heng bakah hian Rooftop Solar Plant in Power a siamchhuah te chu a neitu in a man hran chawi ngai lovin an hman theih avangin man chawi ngai (Grid power) a hman chu a tlem phah dawn thu EE chuan sawiin, “RTS atanga energy hman sen loh a siamchhuah chuan Sawrkar-ah a hralhchhuak thei. Tuna Mizoram sawrkar hnena hralhna man chu Rs. 4.82/unit a ni,” a ti a. Sawrkar laipui leh State sawrkar in hemi atana Subsidy a pek dan hrang hrang pawh a tarlang bawk.

Er. Lalramnghaka chuan tun dinhmunah Serchhip District-ah Rooftop Solar Scheme hmangtu an la tlem thu sawiin, Application 16 lut tawhin mi 13 te bun sak an nih tawh thu leh kawlphetha MW 0.06 chauh la tharchhuah a nih thu a sawi a. Hei vang hian mipui ten he ruahmanna hi an hriatchian a an chhawr tangkai a pawimawh thu sawiin, chumi atan chuan he hun hi buatsaih a nih thu a sawi a ni.

Nimin-a he hun hman ah hian Serchhip-a khawtlang hruaitu, NGO leh sawrkar Department hrang hrang hotute telin Serchhip Power Sub-Division-a SDO Er. H. Zoramthanga leh Serchhip Sub-Station Sub-Division a SDO PC. Lalrem-ruata ten an Bial chhunga he hmalakna an kalpui tawh dan leh Rooftop Solar Plant nei tawh ten hlawkna an hmuh tawh dan te an sawi a. Empanelled Vendors atangin Thado Green Tech leh Swastik Enterprise ten he hmalakna an kalpui dan te sawiin, zawhna leh chhanna hun te hman nghal a ni bawk.