Police, Home Guard leh Excise Constable la dawn

Home Minister K. Sapdanga chuan Police mi 350 lak leh tum an nih thu sawiin, Excise Minister Lalnghinglova Hmar pawhin Recruitment Rules thar hnuaiah Constable tha tak tak an lak dawn thu a sawi bawk.

Tunkar tir-a ZPM Chhung Inkhawm neih ah Home Minister K. Sapdanga chuan sawrkar in a phalsak angin Home Department chuan Police Tiang keng chi 150 leh Silai keng chi 200, a vaiin 350 lak leh an tum tih sawiin, “Nikum-ah fair takin lak a ni a, kan zawngchhang. A fair leh hle ang. Physical Efficiency Test, Written exam leh Interview a awm leh ang. Heng inelna chi thum hi mark puttir vek tum a ni. Silai pu tura saptawng thiam kawngro suttir lutuk kha a awm tawh lo ang. Sawrkar thupek angin exam zawhna chu MPSC-in siamin a endik leh ang,” a ti a. Mizoram Home Guard lakna turin advertisement tih chhuah tawh a nih thu pawh sawiin, Hmeichhe quota a khah tawh avangin mipa tan chauh a ni rih ang tih a sawi a. “Matric Pass chin, mi chak, discipline tha mi 94, fair takin lak kan tum a. Physical Efficiency Test leh Interview a awm ang a, mark a pu ve ve ang,” a ti bawk.

Excise Minister Lalnghinglova Hmar pawhin Recruitment Rules thar hnuaia hna lak turah Constable tha tak tak an la dawn tih sawiin, Excise Department hna lak thinah mithiam tak tak ten hna sang zawk zawn chhunga hlawh an hmuh theih nan an dil thin tih sawiin, a hnuah Excise hna chu an kalsan leh mai thin tih a sawi a. Recruitment Rules tharah erawh Physical leh Written in mark 200 ve ve leh Interview in mark 50 a pu dawn tih a sawi a, taksa lama inthazo tak leh chhawr tangkai theih tur an lak ngei a beisei thu leh tunhnaia Constable an lak turah mi 30 tha tak lak an beisei thu a sawi a, Recruitment Rules siam that chu thil hautak tak ni mahse thawktu tha zawk leh tangkai zawk an lak theihna tur anih thu a sawi bawk.