MTSA in Director rawih nawn dodalna pawi an ti

Mizoram Tourism Service Association (MTSA) chuan Tourism Department Director atana sawrkar in R. Lalrodingi a rawih nawn an thlawp thu leh Director atana dah a nihna dodal zawnga pawl pakhat hmalakna awm mek chu pawi an tih thu an sawi.

Nimin-a thuchhuah an siam ah Mizoram Tourism Service Association (MTSA) chuan Mizo-ram Sawrkarin an harsatna hrethiama OSD to Chief Minister R. Lalrodingi’n Director, Tourism Department additional charge lak a phalna May 22, 2026-a a tihchhuah avanga an lawm thu an tarlang a. “Amaherawhchu, pawl pakhatin he Order duhlohna lantir a Directorate of Tourism Officers leh Staff-te Pisa kai tur dang a, hna thawk theilova min siam hi a pawi kan ti hle a ni,” tiin “Pi R. Lalrodingi’n Director post a chelh avang hian Joint Director leh Officer dangte kaisanna tur a dal lova, zirlai leh thalai hna zawng mekte dalna a nei lo bawk a ni,” an ti.

MTSA chuan Tourism Director post chu direct recruitment-a luh theih ni lovin Joint Director-in qualifying service a neih hnuah kaisangin, a hnuaia mite an chhoh diat diat hnuah chauh direct recruitment hi tih theih a nih thu pawh sawiin, “Additional Director, Commerce & Industries Department leh Director, Tourism Department hi Pay Level inang a nih avangin he post chelh hi kaisanna a ni lo,” an ti a. Tuna Sawrkarin ruahmanna a siam chu Director post luah thei an la awm rih loh avang leh ‘Stop Gap Arrangement’ mai a nih thu an sawi bawk a. An thuchhuah siam chu lungrual taka an siam a nih thu an sawi bawk.

Hetihlai hian MZP chuan Tourism Director atana R. Lalrodingi rawih nawnna Order sut tura an ngenna-a an hmalakna kal zelah nimin khan a ni thumna atan Tourism -a thawktute Pisa kai tur hi an dang chhunzawm leh a, MZP chuan an kal zel dan tur ngaihtuahin Vawiin, May 28, 2026 chawhnu dar 1:00 hian thutkhawm an nei dawn tih an sawi bawk.