Election Commission of India-in SIR a kalpui thei tih Supreme Court in a nemnghet

India rama Court sang ber, Supreme Court chuan Election Commission of India (ECI) in a bik taka Electoral Roll ennawnna, ‘Special Intensive Revision’ (SIR) an kalpui thei tih nimin khan nemnghetin, Article 324 hnuaiah ECI hian inthlanna felfai leh dik taka an kalpui theihna turin thuneihna zau tak an nei tih a sawi.
Bihar-a Special Intensive Revision (SIR) kalpui chungchanga thubuai thehluh ah nimin khan Supreme Court chuan hnawlin, “Article 324 hian ECI chu thuneihna zau tak ‘plenary power’ a pe a, chu thuneihna chuan inthlanna dik leh felfai kalpui theihna tura hmalakna pawimawh zawng zawng, Elector Roll ngun taka ennawn thlengin a huam tel a ni,” a ti. Court chuan thubuai thehluttute thu thlen, ‘Parliament-in Election chungchanga Dan a siam tawh hnuah ECI-in thuneihna a nei tawh lo a ni,’ tih an sawi chu hnawlin, “ECI thuneihna leh Parliament Dan siamte hi inkalh lo a, inhnerem taka kaldun tur an ni,” a ti a. “ECI-in Parliament Dan siam a kalh tur a ni lo a, Parliament Dan siam hmangin ECI thuneihna (Constitutional mandate) tihbo sak emaw, che theiloa siam (extinguish or paralyse) theih a ni hek lo,” a ti bawk.

Supreme Court chuan Representation of the People Act, 1950-a Section 21(3) pawh a hrilhfiah a. “He Section hian ECI-in dik leh tha an tih anga Electoral Roll ennawn thei turin thuneihna zau tak a pe a ni,” a ti a. Court ngaihdanah chuan he Provision hian dik leh felfai taka inthlanna buatsaih kawngah daltu leh tikhawlo theitu apiang hmachhawn turin a tul anga inpawhfan theihna (flexibility) a pe tih a sawi a. Court chuan ECI-in tawp chin neilo thuneihna an nei bik lo tih a sawi chian rualin, “India Danpui leh Parliament rorelna kalhin hma an la thei bik chuang lo,” a ti a. Amaherawhchu, thubuai thehluttuten SIR-in dan a kalhna lai Court hmaah chiang takin an lantir thei lo tiin an thubuai thehluh chu a hnawl a ni.

Hei bakah hian Court chuan Article 324 chu ‘living Constitutional power’ a nih thu sawiin, “Dan awmsa nen inkalh loa hman a nih chuan Election Commission chu mipui sawrkar - democracy thianghlimna humhim turin chakna leh theihna a pe a ni,” a ti bawk.