POWER & ELECTRICITY DEPARTMENT

POWER & ELECTRICITY DEPARTMENT

- Eddy Zosangliana Colney

General Secretary (GAD)

ZPM Gen.Hqrs, Aizawl

Sawrkar hi mipuite ta, mipuite siam a ni a. Sawrkarin eng nge a tih tih hi a siamtu mipui ten hriat hi kan chanvo a ni. ZPM in sawrkarna a chan atangin kum khat leh thla riatna a kal mek a. Sawrkarna a chan hnuah hian eng nge a tih, engtiang chiahin nge hna a thawh tih te a theih ang angin, Department hrang hrangte a tahtawlin tarlan kan tum dawn a ni. Revenue Department chungchang kan tarlang tawh a, tun tumah hi chuan Power & Electricity Department hnathawhte kan tarlang ve thung dawn a ni.

Power & Electricity Department hnuaiah hian a nghet lova kum rei tak lo thawk tawh, a then te phei chu kum 20 chuangte a nghet lova lo thawk tawh mi 342 te dah ngheh an ni. Power leina man a hun taka kan pek avanga hlawkna (rebate) December 2023 atanga August, 2025 chhunga hmuh tawh zawng zawng chu Rs.463.19 lakhs a ni.

Power bill a hun taka pek thin a nih avang hian power kan hman sen loh hralhna kawngah harsatna kum danga awm thin chu a bo ta a. Chuvang chuan December 2023 atanga August 2025 thla thlenga power hralhna atanga sum kan hmuh zat chu Rs. 137,35,45,753/- lai a tling phak a ni.

Sub-Station lian - Luangmual, Zuangtui leh Melriat khua te power lakluhna pahnih theuh (double source) neia siam a nih tak avangin siamthat (maintenance) hna thawh laia rei tak tak power supply tihtawp lailawk (shut down) ngai thin leh, chumi avanga mipui tawrh thin na chu tunah chuan 'shut down' kher ngai tawh lovin hna a thawh theih ta a ni.

ZPM in sawrkarna a chan phat atangin kawlphethaa intodelh tura hmalakna kalpui nghal a ni a. Hydel Project (tuikhuah) lamah chak taka hmalakna kalpui a ni a. Megawatt 24 tharchhuak thei Tuirini Hydel Project chu kumin 2025 chhunga vung chhuah hman ngei turin theihtawp chhuaha hmalak mek a ni. Tuirini HP hi Externaly Aided Project (EAP) atanga funding tur niin New Development Bank sum hmanga hnathawh tur a ni. Tun dinhmunah Project Monitoring Unit (PMU) din fel tawh niin PMU hian tuikhuah hna thawk tan thuai turin chak takin tihtur tul te bawhzuiin hma a la mek a ni.

Megawatt 132 thar chhuak thei tur Tuivai Hydel Project DPR revised chu peihfel niin September 3, 2025 khan revised DPR buaipui tu Ernst and Young LLP ten Mizoram sawrkar kutah an hlan fel tawh a. Tuivai khuahna atan a sum mamawh funding tu tur zawn mek a ni a, hei hi tihfel a nih chuan tuikhuah hna hi tan thuai theih beisei a ni. Megawatt 120 tharchhuak thei tur Tlawng Hydel Project chu Detailed Project Report (DPR) ennawn (revised) mek a ni bawk. Aizawl khaw chhuah lam veng hrang hrang power harsatna sukiang turin Chite Sub-Station chu March 8, 2025 khan hawn a lo ni tawh bawk a ni.

Hydel Project (Tuikhuah) chauh ni lovin Solar Power Generation lamah pawh tan nasa taka lak a ni a. Megawatt 10 tharchhuak thei tur Thenzawl Solar Plant chu peih fel thawkhat niin hun reilote ah hawn (commission) tur a ruahman a ni. Sumsuih-ah 5MW tharchhuak thei tur Solar Plant siam hna chu contractor thlan fel a nih ve leh hna tan nghal tura ruahman a ni bawk.

Sawrkar laipui Scheme, PM Surya Ghar Scheme hnuaiah Muft Bijli Yojana (Rooftop Solar) mimal In 472-ah bun fel tawh a ni a, heng atanga power tharchhuah theih zat (installed capacity) hi 1.845 MW a ni. PM Surya Ghar Scheme hnuaiah hian central subsidy 60% pek a nih bakah State dangin an pek ve loh State subsidy 20% pek tel a ni bawk. State Subsidy atan hian cheng Vbc 4 zet Mizoram sawrkar-in a dah a ni.

Heng bakah hian Mizoram chhung khaw nga-ah Solar plant bun turin hmalak a ni a, Expression of Interest (EOI) tihchhuah mek a ni. Chung hmun panga te leh power an tharchhuah theih zat tur chu hetiang hi a ni. - Tumtui Tlang, Serchhip, Serchhip District – 10 MW, Bawkmual, Hmunhmeltha, Champhai District – 10 MW, Denlung Ram, Hnahthial, Hnahthial District – 10 MW, Tlabung Tlang, Lallen, Mamit District - 6 MW, Dawhzau Zau, Lamzawl, Saitual District – 20 MW, a vaiin 56MW zet a ni.

Hydel Project (tuikhuah) leh Solar Power Generation lama hmalakna mai bakah hian kan power semchhuahna hrui siam thar leh a hlui thawmthat kawngah pawh Power & Electricity Department hian hma an la nasa hle a.

March 8, 2025 khan 132kV Sihhmui - Zuangtui line thar hawn a ni a, he line thar hian Mizoram-a 132 kV Sub-Station lian pathum – Zuangtui, Luangmual leh Sihhmui te a thlunzawm vek a. Heng line te hian line chhia leh siamthat/siamthar a ngaih avanga power supply tihtawp lailawk (shutdown) a tul chang pawhin power lakluhna line dang an neih tak vek avangin mupuite hnena power supply pek a khaihlak phah tawh dawn lo a ni.

Mamit District chhunga Power Suply lama harsatna 132/33 kV Sub-Station W. Phaileng-ah leh Marpara Sub-Station-a siam hna zawh fel a ni a, hemi rual hian Power line lian zawk Bairabi - W.Phaileng via Mamit, Kilometre 74 a thui thlun hna pawh thawh zawh tawh niin, 33 kV line Mamit – Zawlnuam siam zawh tawh a ni bawk.

Power & Electricity Department hmasawnna chhinchhiah tlak em em leh mipui tana awlsamna thlentu langsar em em mai chu Online a bill pek theih a ni ta hi a ni.

Electric Billing Software thar chu August 1, 2025 atang khan Mizoram pumah hman tan a ni a, Mizoram puma billing software pakhat hman a nih vawikhatna a ni. He billing system hmang hian Mobile Android leh IOS application (PEDM apps) atangin Mizoram khawi hmun atang pawhin online hmanga bill pek theih a ni ta a ni.

Revamp Distribution Sector Scheme (RDSS) hnuaiah Mizoram-a Electric Consumer zawng zawng te Prepaid Smart Meter vuah vek tura hnathawh mek a ni a. RDSS hnuai atang vêk hian Mizoram hmun hrang hrangah 11kV line 115.34 Km-a thui leh LT Line 57524 Km-a thui siam hna thawh mek a ni bawk. Power Supply la luh lohna thingtlang khua 16 tih ên a ni dawn a, Power Supply luh tawhna khua 311 atangin chhungkaw 11448-te hnenah Electric Connection thar a thlawna pek a ni dawn bawk a ni. Chawnhu, Lawngtlai leh Lungsen, Lunglei District-ah 132kV Sub-Station siam mek a ni a, hengte hi kumin chhunga mipui chhawr theih tura zawh hman beisei a ni bawk.

ZPM sawrkar a dintirh khan Mizoram hmun hrang hranga power supply inpekchhawnna te a chhe em em mai a, chumi siamtha tur chuan sawrkar tharin chak takin hma a la nghal a, sum renchem taka hmangin khawl leh bungraw mamawh hmasate a tahtawla lei zel niin, tun dinhmunah Transformer thar 7 leh Distribution Transformer 43 lei tawh a ni a, a hlui tam tak thawm that a ni bawk. Heng bakah hian bungraw pawimawh tak tak line gang, MCCB, Main switch, 11kV Control Panel, 132kV Sub-Station atan breaker, isolator, Current Transformer (CT) thahnem tak lei thar a ni bawk a, line 234.15 Km a thui siam that a ni tawh bawk.

132/33kV Sub-Station pasarih– Bawktlang, Saitual, Melriat, Champhai, Serchhip, E. Lungdar leh Kawmzawl Sub-Station chei that nan leh capacity tih lenna tur NESIDS (OTRI) atangin Rs. 47.87cr sanction hmuh a ni a. Zuangtui leh Bukpui line thlunzawmna Panther Conductor chu current keng hnem thei zawk HTLS conductor hmanga thlakna tur NESIDS (OTRI) atang vêk hian sanction hmuh a ni tawh bawk.