Dampa Bial-ah party hrang hrang ten ngawrh takin campaign an nei mek

Tun thla ni 11-a Dampa Bial-a Assembly by-election neih tur atan Campaign chuan a vanglai a thleng chho mek a, Candidate hrang hrang te leh party hrang hrang ten Bial chhunga khaw hrang hrangah Campaign an nei chho mek a ni.

Dampa Bial-a by-election neih turah hian ZPM Leader Lalduhoma chu Inrinni khan an Party Candidate Vanlalsailova tana Campaign in Hnahva leh Silsuri khua te a tlawh a, Dampa Bial leh Mizoram chu PC-in reilo te tih loh chu MNF leh Congress ten kum 50 zet an enkawl tawh tih sawiin, “Dampa Bial hi India ram District hnufual 800 vel zingah a la awm reng a, Ruling hian khaichhuah kan tum a ni,” tiin “Kan Candidate in vote hian in tu leh fa te tán in vote a, ZPM policy in vote a, kei min vote bawk. Ruling nih in duh leh duh loh chu nangmahni duhthlannaah a innghat,” a ti a, 'Khawvar hnua inthlang' an nihna angin duhthlang thiam turin Dampa Bial mipui te ngaihtuah uluk turin a ngen bawk.

MNF Sr. Vice President leh Dampa Bial-a an Candidate Dr. R. Lalthangliana chuan Inrinni khan Saithah, Lallen, Kawnmawi leh Chhippui-te tlawhin MNF party hruaitute nen an inkawm a, ZPM sawrkarah Ruling MLA leh Opposition MLA-te an danglam bik vakna a hriat loh thu sawiin, Dampa Bial-ah hian ZPM hian MLA neih belh se la, ZPM sawrkar chu a ngai renga a kal tur thu a sawi a, “Kei hi min thlang tling ula in Bial tan danglamna nasa tak ka thlen ngei ka inbeisei a, in inchhir ka ring lo,” tiin khawngaih Vote a dil nghal bawk a ni.

BJP Party chuan Zirtawpni zan khan Kanghmun Khua Community Hall-ah Vantlang Inkhawm buatsaihin he hunah hian MLA, K. Hrahmo chuan thu a sawi a, Mizoram-ah Party lian tak tak Sawrkar kan hrawn tawh tih sawiin, “Vawiin-ah hian Party lian te hi kan hrechiang tawh hle a, Vawiin-ah hian Dampa Bial hian hmangaihtu tak kan hriatchhuaha kan thlanchhuah a pawimawh hle dawn a ni,” tiin an mamawh pe thei tur dik tak Central nena inzawm an ngaih pawimawh a tul thu a sawi bawk a ni.

Congress Party pawhin an President Lal Thanzara hovin kar kalta khan Marpara, Pukzing Vengthar, Lenbuang (Bekabekya), Hnahva leh Silsury-ah te campaign an nei a, he hunah hian Ngunlianchunga MLA leh Party hruaitu dang te pawh an kal bawk a ni.