2-Dampa (ST) AC by-election Nov. 11, 2025-ah neih a ni dawn

Bialtu MLA a boral avanga by-election neihna tur Mizoram-a 2-Dampa (ST) AC-ah thla thar November 11 khian mipui ten Vote thlakin MLA thlanna neih a ni dawn.

Election Commission of India chuan nimin tlai khan New Delhi-ah thuthar thehdarhtute kawmin Bihar State-a Assembly Inthlanpui neih hun tur puangin hemi rual hian ramchhung hmun hrang hranga Assembly by-election neih hun tur pawh a puang nghal a. Inthlanna neih hun tur puan zingah hian Mizoram atangin 2-Dampa (ST) AC hi telin ECI in ruahmanna siam ang chuan he Bial-a by-election neih tur atan hian October 13, 2025-ah hriattirna tihchhuah a ni anga, inthlanna chuh tumte tan October 21, 2025 (Thawhlehni) thlengin Nomination thehluh theih a ni ang. Inthlanna chuh tura hming pekluh te hi October 22-ah enfiahin Oct. 24, 2025 (Zirtawpni) thlengin inhnuhdawhna hun hawn leh a ni anga, Vote nei ten November 11, 2025-ah Vote thlakin Vote tla te chu November 14, 2025 (Zirtawpni)-ah chhiar a ni ang.

Dampa Bial-ah hian Polling Station 41 awmin Vote nei Mipa 10,605 leh hmeichhia 10,185; an vaiin Vote nei 20,790 an awm a, Service Voters 115 awm bawkin inthlan hun puan a nih rual hian Model Code of Conduct hman nghal a ni bawk.